बुटवल । मंगलबार बिहान रुपन्देहीको तिलोत्तमा १० कान्छी बजारमा भएको सामुहिक हत्याका बिषयमा नेपाल कम्युनिष्ट पार्टी (नेकपा) का महासचिव विष्णु पौडेल र नेपाली कांग्रेस संसदीयदलका प्रमुख सचेतक बालकृष्ण खांडले छुट्टाछुट्टै बिज्ञप्ति प्रकाशित गरेर घटनाको सत्यतथ्य छानबिन गर्न माग गरेकाछन् । उनीहरुले दोषी माथि कारवाही र पिडीतलाई क्षतिपुर्तिको माग गरेका छन् ।
रुपन्देही निर्वाचन क्षेत्र नम्बर २ का प्रतिनिधिसभा सदस्य तथा नेकपाका महासचिव विष्णु पौडेलले मँगलबार एक विज्ञप्ति जारी गर्दै रुपन्देहीको तिलोत्तमामा गएराती भएको सामुहित हत्याको सत्यतथ्य छानविन गर्न माग गर्नुभएको छ । महासचिव पौडेलले घटना बारे सत्यतथ्य छानविन गरी दोषीलाई कारबाही गर्न माग गर्दै विज्ञप्तिमा मृतकका परिवारलाई उचित राहत एवं क्षतिपूर्तिको व्यवस्था गर्न माग गर्नुभएको छ ।
पौडेलले समाजमा डरलाग्दो ढंगले देखा परिरहेका यस किसिमका आपराधिक मनोवृती फैलिन नदिन तथा नागरिकलाई सुरक्षाको प्रत्याभुती गर्न् सम्बन्धित निकायको ध्यानाकर्षण गराउनुभएको छ ।
रुपन्देही तिलोत्तमा स्थित स्थानीय कृष्णबहादुर पुनको गंगादेवी पशु फार्ममा कार्यरत पाँच जनमा कामदारको विभत्स हत्या भएको घटना प्रति नेपाली काँग्रेसका संघीय सांसद बालकृष्ण खाँणले पनि दुःख ब्यक्त गर्नुभएको छ ।
नेपाली काँग्रेस संसदिय दलका प्रमुख सचेतक समेत रहनुभएका सांसद खाँणले विज्ञप्ति जारी गरेर कोरोनाको महामारीबाट देशबासी आक्रान्त भईरहेको अवस्थामा यस प्रकारका अपराधिक घटनाले आमनागरिकमा थप आतंक सृजना भएको उल्लेख गर्नुभएको छ ।
देशमा एक पछि अर्को सामूहिक हत्याहरु श्रृंखलाबद्ध रुपमा भईरहंदा आम नागरिकहरुले असुरक्षित महशुस गरिरहेका छन् भन्दै सांसद खाँणले वर्तमान सरकारले आम नागरिकमा शान्ति सुरक्षाको प्रत्याभूति दिन नसकेको उल्लेख गर्नुभएको छ ।सांसद खाँणले विज्ञप्ति मार्फत आम नागरिकको सुरक्षाका साथै रुपन्देहीको कान्छिबजारमा भएको हिंसात्मक घटनाको सत्यतथ्य छानविन गरी दोषीलाई कडा भन्दा कडा कारवाहीका लागि सम्वन्धित निकायसंग माग गर्नुभएको छ ।
प्रतिक्रिया