मुलुकमा परिवर्तन ल्याउन भूमिका खेल्ने अनेरास्ववियुले माग्यो पूर्वपञ्च बोहोराको पक्षमा मत

भैरहवा । पञ्चायती व्यवस्था विरुद्ध अनवरत संघर्षको अग्रमोर्चामा रहेर इतिहास कायम गरेको विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)का केन्द्रीय सचिवालय सदस्य लक्ष्मी केसीले पुर्वपञ्च दीपक बोहोरालाई भैरहवा र यस क्षेत्रको विकासमा अहोरात्र खट्ने विकासप्रेमी नेताको संज्ञा दिएकी छन् । तीनदलीय संयुक्त विद्यार्थी संगठनको आयोजनामा बुधबार भैरहवामा आयोजना गरिएको कार्यक्रममा विद्यार्थी नेता केसीले विकासका लागि बोहरालाई जिताउनुपर्ने बताइन् ।

भैरहवाको विकासका लागि गृहमन्त्री बालकृष्ण खाँणले गरेको विकास प्रति प्रश्न गर्दै उनले काम गरेर देखाउने नेतालाई जनताले जिताउनुपर्ने बताइन् ।

अनेरास्ववियूका केन्द्रीय सदस्य सरोज ठकुरीले एमाले, राप्रपा र जसपाका उम्मेदवारलाई अत्याधिक मतले जिताउनुपर्ने बताए । ‘विकासका लागि दीपक बोहरा, महेन्द्र यादव र तुल्सी प्रसाद चौधरीलाई जिताउनुपर्छ ।’ उनले भने ।

नेकपा (एमाले) सिद्धार्थनगरका अध्यक्ष चक्र बहादुर थापाले मुलुकमा परिवर्तन ल्याउन विद्यार्थीको भूमिका महत्वपूर्ण रहेको उल्लेख गर्दै बोहोराको पक्षमा लाग्न विद्यार्थीहरुलाई आग्रह गरे । उनले महंगी र भ्रष्टाचारविरुद्ध विद्यार्थीहरुले आवाज उठाउँदै आएको चर्चा पनि गरे ।

रुपन्देही ३ बाट एमालेको समर्थनमा राप्रपाका नेता दीपक बोहोरा प्रतिनिधिसभाका उम्मेदवार छन् ।