२० देशका नेपाली बालबालिकाले साटासाट गरे कोरोना कहरको अनुभव

लण्डन । विश्वभर फैलिएको कोरानो भाइरस (कोभिड–१९) का कारण लकडाउनमा घरमै बस्न बाध्य नेपाली बालबालिकाहरुले आफ्नो अनुभव साटासाट गरेका छन् ।

गैरआवासीय नेपाली संघअन्तरर्गतको स्वास्थ्य समितिको संयोजनामा शनिवार जुममार्फत् भएको भेलामा २० देशका १२ वर्ष मुनिका नेपाली बालबालिका सहभागी भए ।

सहभागीहरुले कोरोना कहरमा आफूले भोगेको अनुभव मन खोलेर सुनाएका थिए । सभ्यता शर्मा (१०) र अलिसा कार्की (१२)ले सञ्चालन गरेको कार्यक्रममा नेपाललगायत अष्ट्रेलिया, नाइजेरिया, क्यानाडा, साउदी अरब, अमेरिका, जापान, बहराइन, इटाली, चीन, कतार, युएई, दक्षिण कोरिया, बेलायतलगायतका देशमा रहेका दोस्रो पुस्ताका नेपाली बालबालिकाहरु सहभागी थिए ।

कार्यक्रममा अविराज थेवे, टिया आचार्य, अभिन पौडेल, अस्मि अधिकारी, दिलासा शर्मा, जयन महमद सइयाद, कीर्तिका तिमल्सिना, कृष्ण थापा, कीर्तिका राउत, लियन अहमद, म्यार्लिन न्यौपाने, निर्भिक अर्याल, प्रजन सिटौला, प्रशिद्ध पन्त, सक्षी भट्टराई, सिओयन थापा, शैलेश शर्मा, स्मिड गैरे, स्नेहा चौधरी, युभरानी गुरुङलगायतले कोरोना कहरको अनुभव सुनाए ।

दुई दर्जनभन्दा बढी बालबालिका सहभागी कार्यक्रममा सबैभन्दा सानी ५ वर्षका युभरानी गुरुङ (युके) र म्यार्लिन न्यौपाने थिए । सो कार्यक्रमको संयोजन एनआरएनए स्वास्थ्य समितिको तर्फबाट विमला सापकोटा, डा. सञ्जिव सापकोटा, सत्य चौधरी, यस्मिन बेगम सइयदले गरेका थिए । सो कार्यक्रमलाई गैरआवासीय नेपाली संघको अधिकारीक फेजबुक पेजबाट प्रत्यक्ष प्रसारण गरिएको थियो ।