सुर्खेत । मुगुका बाढीपहिरो पीडितलाई राहत सामग्री वितरण गरिएको छ । गत असोज १९ गतेदेखि २४ गतेसम्म आएको वर्षासँगैको बाढीपहिरोबाट घर गुमाएका पीडित १ सय ८ जनालाई राहतसँगै सरसफाई सामग्री वितरण गरिएको हो ।
सिबि एम नेपालको आर्थिक सहयोग तथा आई एन एफ नेपाल मुगुको आयोजनमा छायाँनाथ रारा नगरपालिका वडा नम्बर ४, ६, ७, १०, १२ का १ सय ८ जनालाई राहत सामग्री २५ केजी चामल, दुई केजी दाल, दुई केजी चिनी, नुन एक केजी, स्वयाविन एक केजी, मसाला ८ं० ग्राम लगायत आवश्यक खाद्यान्न सामग्री वितरण गरिएको सहयोगी संस्था आई एन एफ नेपाल मुगुले जनाएको छ ।
यसैबीच बाढीपहिरो पीडितलाई सरसफाई सामग्री साबुन, काईयो, निलकटर, ऐनालगायत वितरण गरिएको छ । साथै २३ जना अति विपन्न पहिरो पीडित बालबालीकाको शैक्षिक सुधारका निम्ती शैक्षिक सामग्री पनि वितरण गरिएको आई एन एफ नेपाल मुगुका परियोजना अधिकृत अर्पिताता कार्कीले बताइन् ।
उनका अनुसार छायाँनाथ रारा नगरपालिकासँग समन्वय गरेर नगरपालिकाले पहिरो पीडितका तथ्यांकको आधारमा घर गुमाएका अति विपन्न परिवारलाई राहत वितरण गरिएको हो । उक्त राहत छायाँनाथ रारा नगरपालिकामा मात्र नभई सोरु गाउँपालिकामा पनि पहिरो पीडित ६० जना लाई र खत्याड गाउँपालिकामा ६८ जनालाई सहयोग गरिने परियोजना अधिकृत कार्कीको भनाई छ ।
मंगलबार छायाँनाथ रारा नगरपालिकाकाका प्रमुख विष्णुकुमार भामको उपस्थितीमा नगरपालिकाभित्रका बाढीपहिरो पीडितलाई राहत वितरण गरिएको छ । साथै, अन्य गाउँपालिकामा पनि गाउँपालिकासँग समन्वय गरेर राहत वितरण गरिने बताइएको छ । १७ लाख बराबरको खाद्यान्न, सरसफाई सामग्री र शैक्षिक सामग्री पहिरो पीडितलाई सहयोग गरिने आई एन एफ नेपाल मुगुले जनाएको छ ।
प्रतिक्रिया