नेपालगन्ज । बाँकेको नेपालगन्जमा दिनदहाडै खुकुरी प्रहार गरि फरार भएकाहरुलाई बाँके प्रहरीले घटना घटेको २४ घण्टा नपुग्दै पक्राउ गर्न सफल भएको छ । हिजो (आइताबर) मध्यान्ह २ बजे नेपालगन्ज ४ गणेशपुरमा खुकुरी प्रहार गरेर फरार भएका ४ जनालाई प्रहरीले घटना घटेको २४ घण्टा नपुग्दै पक्राउ गरेको हो ।
आइतबार मध्यान्ह २ बजे UP 32 EU 8616 नम्बरको कारमा आएर खुकुरी प्रहार गरि फरार भएका विनय भण्डारी, नारायण डाँगी, प्रकाश रसाईली, तासे भन्ने प्रकाश थापालाई प्रहरीले बाँकेको डुडुवाबाट पक्राउ गरेको हो । पक्राउ परेकाहरुले नेपालगंज उप-महानगरपालिका १२ वस्ने अनुराग शाह, जानकी ३ बस्ने उज्वल शाह र नेपालगंज उप-महानगरपालिका ४ वस्ने सुभमजंग शाहलाई खुकुरी प्रहार गरी घाइते बनाएर फरार भएका थिए ।
घटना भएलगत्तै बाँके प्रहरी प्रमुख एसपी सन्तोष सिंह राठौरको कमाण्डमा खटिएको प्रहरी टोलीले तत्काल घाइतेहरुलाई उपचारको लागि नेपालगंज शिक्षण अस्पताल नेपालगंज पु¥याइएको र खुकुरी प्रहार गर्नेहरुको खोजि थालेको प्रहरीले जनाएको छ । प्रहरीका अनुसार खुकुरी प्रहार गर्नेहरुको पिछा गर्नेक्रममा प्रहरीले उनीहरुले प्रयोग गरेको कार डुडुवा ३ स्थित बनकट्टीबाट रामपुरुवा जाने कच्ची बाटोको दक्षिणतर्फ गहुँ लगाएको खेतमा फेला पारेको थियो ।
कार फेलापरेको नजिकैबाट घटनामा संलग्न ४ जनालाई पक्राउ गरिएको बाँके प्रहरी प्रमुख एसपी राठौरले बताए । उनले घटनामा प्रयोग भएका २ थान खुकुरी जिल्ला बाँके नेपालगंज ५ फुल्टेक्रा स्थित सडक बाटो नजिक बुट्यान झाँडीमा फेला परेको समेत जानकारी दिए ।
पक्राउ परेकाहरुमाथि थप अनुसनधान शुरु गरिएको प्रहरीले जनाएको छ ।
प्रतिक्रिया