काठमाडौं, १२ फागुन । सरकारको नेतृत्व गरेको नेकपा माओवादी, नेपाली कांग्रेससहित ८ दलले राष्ट्रपतिमा कांग्रेस उम्मेदवारलाई समर्थन गर्ने निर्णय गरेका छन् ।
प्रधानमन्त्री निवास बालुवाटारमा आज साँझ बसेको दलहरुको बैठकले राष्ट्रपतिमा कांग्रेसका उम्मेदवारलाई समर्थन गर्ने निर्णय गरेको हो ।
बैठकमा प्रधमनमन्त्री पुष्पकमल दाहाल प्रचण्डले कांग्रेसलाई राष्ट्रपतिको चुनावमा समर्थन गर्ने प्रस्ताव राखेका थिए । सो प्रस्तावलाई सबै दलहरुले समर्थन गरेका थिए । यसअघि राष्ट्रपतिमा आफ्नो समेत दाबी गर्दै आएको नेकपा एकीकृत समाजवादीले समेत प्रचण्डको प्रस्तावलाई समर्थन गरेपछि सबै दलहरुबीच समर्थन जुटेको थियो ।
बैठकमा चुनाव पूर्वको गठबन्धनका पाँच दल, लोसपा, नागरिक उन्मुक्ति पार्टी र जनमत पार्टीका शीर्ष नेता सहभागी थिए ।
बैठकमा प्रचण्डले आजैबाट नयाँ राजनीतिक यात्रा सुरुवात भएको बताएका थिए । बैठकपछि एकीकृत समाजवादीका नेता प्रकाश ज्वालाले भने, ‘संसदको ठूलो दल कांग्रेसलाई राष्ट्रपतिमा समर्थन गर्ने निर्णयका क्रममा प्रधानमन्त्रीले आजैदेखि नयाँ राजनीतिक यात्रा सुरु भएको घोषणा गर्नुभयो । ’
प्रतिक्रिया