नेपालगन्ज । समुदायस्तरमा कोरोना संक्रमण तिब्र बनेपछि बाँकेको नेपालगन्ज उपमहानगरपालिकाका अधिकांश क्षेत्र सिल गरिएको छ ।
बाँके जिल्ला प्रशासन कार्यालयले शनिबार राति १२ बजेदेखि आगामी साउन २७ गते राति १२ बजेसम्मका लागि नेपालगञ्ज उपमहानगरपालिका सिल गरेको हो ।
नगर क्षेत्रको अति जोखिमयुक्त क्षेत्र सिल गरिएको प्रमुख जिल्ला अधिकारी रामबहादुर कुरुम्वाङ्गले बताए ।
स्वाब सङ्कलन र परीक्षणको दायरा बढाउन सिल निश्चित क्षेत्रलाई सिल गर्नुपरेको कुरुम्वाङ्गले बताए ।
शनिबार बसेको जिल्ला कोभिड–१९ सङ्कट व्यवस्थापन केन्द्रको बैठकले नेपालगञ्जको गणेशमान चोक, चारबाहिनी क्षेत्र, बाँके गाउँ सिल गरेको हो ।
यसैगरी, रिङ्गरोग, नहरपुरवा हुँदै बसपार्क र पुष्पलाल चोकसम्मको क्षेत्र पनि सिल गर्ने निर्णय भएको छ।
त्यसक्षेत्रमा सेनासहितका सुरक्षाकर्मी परिचालन गर्ने निर्णय गरिएको छ ।
सिल गरिएको क्षेत्रमा पैदल हिँडडुलमा समेत निषेध गरिएको छ । एम्बुलेन्स, दमकल र शववाहन जस्ता साधन भने चल्न पाउनेछन् ।
बैठकले साउन १८ गतेदेखि बाँके जिल्लाभरि जारी निषेधाज्ञालाई समेत साउन २७ गते राति १२ बजेसम्मका लागि बढाएको छ ।
निषेधाज्ञा मात्र जारी गरिएको क्षेत्रमा भने अत्यावश्यक वस्तु पसल, व्यवसाय सञ्चालन गर्न पाइने बताइएको छ ।
बाँकेमा शनिबार मात्रै ४९ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
प्रतिक्रिया