भैरहवा । नेपाल कम्युनिस्ट पार्टी (एमाले) रुपन्देहीको १० औं अधिवेशन भैरहवामा सुरु भएको छ । अधिवेशनको पार्टीका उपाध्यक्ष तथा पूर्व उपप्रधान एवं अर्थमन्त्री विष्णु प्रसाद पौडेलले उद्घाटन गरे ।
अधिवेशनको पार्टीका अध्यक्ष तथा पूर्वप्रधानमन्त्री केपी शर्मा ओलीको उपस्थिती रहने प्रचार गरिएपनि अध्यक्ष ओली उपस्थित नभएपछि सहभागी कार्यकर्ताहरुले असन्तुष्टी प्रकट गरेका छन् । अध्यक्ष ओली अस्वस्थताका कारण आउन नसकेको एमाले रुपन्देहीका सचिव यज्ञ गैरेले जानकारी दिए ।
उद्घाटन सत्रमा स्वागत मन्तव्य राख्दै एमाले रुपन्देहीका अध्यक्ष तेजेन्द्र के.सीले एमाले जनताको रोजाइको पार्टी भएको दाबी गरे । उनले २ वर्ष ५ महिनामा पार्टीको संगठनलाई अझ मजबुत र सशक्त बनाइएको बताए ।
अधिवेशनका लागि अध्यक्ष के.सीकै संयोजकत्वमा १६७ जनाको मूल व्यवस्थापन कमिटी चयन गरिएको थियो ।
जिल्लाका १६ वटा पालिका र १५५ वडा, २३ जनसंगठनबाट र आयोजक कमिटीबाट गरी ८५३ जना प्रतिनिधि अधिवेशनमा सहभागी भएका छन् । अधिवेशनले १ अध्यक्ष, १ उपाध्यक्ष, १ सचिव, २ उपसचिव र १४५ सदस्य रहेको जिल्ला कमिटी निर्वाचित गर्ने एमाले रुपन्देहीले जनाएको छ ।
बन्द सत्रमा राजनैतिक प्रतिवेदन, सांगठनिक प्रतिवेदन, आर्थिक प्रतिवेदन पेश गरिनेछ । रुपन्देहीमा एमालेका १७ हजार ९८ जना संगठित पार्टी सदस्य रहेको एमालले दाबी गर्दै आएको छ ।
अधिवेशनबाट नयाँ नेतृत्वको लागि वर्तमान अध्यक्ष तेजेन्द्र केसी, सचिव यज्ञ गैरे, उपसचिव चित्रबहादुर कार्की र हितराज पन्थी आकाँक्षी देखिएका छन् ।
प्रतिक्रिया