दैलेख । दैलेखको पश्चिम ठाटीकाँध गाउँपालिका–४ गैरागाउँमा पहिरोले सात घर बगाएको छ ।
पहिराले घर बगाउँदा एक जनाको मृत्यु भएको छ भने एक जना बेपत्ता छन् । छ जना घाइते भएका छन् ।
मृत्यु हुनेमा ठाटीकाँध गाउँपालिका–४ का १२ वर्षीय जनक कठायत रहेका छन् ।
मृतकका बुबा ४२ वर्षीया टीका कठायत, आमा ४० वर्षीया धनसरा कठायत, दिदी १७ वर्षीया बेल कठायत, दाजु १५ वर्षीय शम्शेर कठायत घाइते भएको वडा नं ४ वडाध्यक्ष रमेश सिजापति बताए ।
सिजापतिले भने, ‘हामीले पहिरो गएको खबर २ बजे पाउनेबित्तिकै उद्धार ग¥यौँ । एकजनाको अवस्था सिकिस्त छ । अन्यको अवस्था सामान्य रहेको छ ।’
बेपत्ता हुनेमा दानबहादुर कठायतका११ वर्षीय छोरा लोकेश कठायत रहेका छन् । लोकेश पहिरामै बेपत्ता भएको स्थानीयवासी बताउँछन् ।
पहिरोले सोही ठाउँका ३४ वर्षीय महेन्द्र शाही र २३ वर्षीय गम्म नेपाली घाइते भएका छन् ।
त्यसैगरी दैलेखको पूर्वमा पर्ने भगवतीमाई गाउँपालिका–५ कट्टीमा पहिराले घर पुरिँदा ६६ वर्षीय बलबहादुर रावतको मृत्यु भएको जिल्ला प्रहरी कार्यालय दैलेखले जनाएको छ ।
मङ्गलबार नै रामघाट खोलामा आएको बाढी आठबिस नगरपालिका– १ रामघाटबजार पस्दा लाखौँ क्षति भएको रामघाट बजारका नैनबहादुर शाहीले बताउनुभयो ।
उनले भने, ‘कर्णाली नदीमा पानी बहाब बढेपछि रामघाट खोलाको पानी राकिएर बजार पस्दा लाखौँको सरसमान बगायो । बजारमा पानी पस्दा मान्छे सुरक्षित ठाउँमा भाग्न सफल भए ।
प्रतिक्रिया