काठमाडौं । प्रधानमन्त्री र उर्जा मन्त्रीको डेडिकेटेड र ट्रंकलाइनको महसुल नबुझाउने उद्योगीहरुको लाईन काट्न नहुने अडान विपरित नेपाल विद्युत् प्राधिकरणले डेडिकेटेड र ट्रंकलाइनको महसुल नबुझाउने ४९ उद्योगको लाइन काटेको छ । प्राधिकरणले दिएको ९० दिनको समयसीमा उद्योगीहरु महसुल बुझाउन नआएपछि प्राधिकरणले आज महसुल नबुझाएका उद्योगको लाईन काटेको हो ।
प्राधिकरणले दिएको ९० दिनको समयसीमा दिएर महसुल बुझाउन पत्राचार गरेको थियो । प्राधिकरणले दिएको समयसीमा आज सकिएको छ ।
तोकिएको समयमा पनि महसुल नबुझाएको भन्दै प्राधिकरणले महसुल नबुझाएका सबै उद्योगको लाइन काटेको स्रोतले दाबी गरेको छ ।
महसुल असुली सम्बन्धमा आज बिहान प्राधिकरण सञ्चालक समितिको बसेको बैठकमा ठोस निश्कर्ष ननिस्केपछि प्राधिकरणले लाईन काटेको हो । बैठकमा ऊर्जामन्त्री दीपक खड्का आर्थिक मन्दीका बेला लाइन काट्न नहुने र काटेमा नराम्रो सन्देश जाने धारणा राखेका थिए ।
प्राधिकरणका प्रबन्ध निर्देशक कुलमान घिसिङ डेडिकेटेड र ट्रंकलाइन प्रयोग गरेको उद्योगहरूले महसुल बुझाउनुपर्ने पक्षमा रहेपनि प्रधानमन्त्री केपी ओली र उर्जामन्त्री खड्का भने महसुल नतिर्ने उद्योगीको पक्षमा देखिएका छन् । प्रबन्ध निर्देशक घिसिङले विद्युत नकाट्नका लागि मन्त्रिपरिषदको निर्णय माग गरेपनि आज बसेको मन्त्रिपरिषदको बैठकले सो सम्बन्धमा छलफल भएपनि कुनै निर्णय नगरेको बताइएको छ ।
प्रतिक्रिया