काठमाडौं । सत्तारुढ एमाले र कांग्रेसले बनाएको उच्चस्तरीय राजनीतिक संयन्त्रको बैठक अहिले प्रधानमन्त्री निवास, बालुवाटारमा बसेको छ ।
प्रधानमन्त्री एवं नेकपा (एमाले)का अध्यक्ष केपी शर्मा ओली, नेपाली कांग्रेसका सभापति एवं पूर्व प्रधानमन्त्री शेरबहादुर देउवा र संयन्त्रमा सम्लग्न दुवै दलका नेताहरू बैठकमा सहभागी छन्।
बैठकमा अध्यादेश कसरी पास गर्नेबारे छलफल केन्द्रित रहेको छ । संसदमा निर्णायार्थ पेश गरिएका ६ वटा अध्यादेश पारित गर्ने आवश्यक संख्या अभाव भएपछि अप्ठेरोमा परेको सरकारले विभिन्न विकल्पहरु खोजिरहेको छ । सरकारमै सहभागी लोसपा र सत्तासाझेदार जसपा नेपालले भूमि अध्यादेश अस्वीकार गर्ने निर्णय गरेपछि एमाले कांग्रेसका नेताहरुको ध्यान अहिले एकीकृत समाजवादीमा रहेको छ । उनीहरुले एकीकृत समाजवादीलाई अध्यादेशबाटै जन्माएको र अध्यादेश ल्याउन नदिएर जोगाएको तर्क गर्दै सो पार्टीका नेताहरुलाई फकाउने र तर्साउने प्रयास गरिरहेका छन् ।
यस्तै बैठकमा सञ्चालनका विषय, संसद्मा प्रभावकारी भूमिकासहित अत्यावश्यक कानुन निर्माणमा तीब्रतालगायत समसामयिक विषयमा छलफल भइरहेको जनाइएको छ।
यसअघि यसै साता दुई पटक संयन्त्रको कार्यदलको बैठक बसेको थियो ।
प्रतिक्रिया