भारतमा कोरोना संक्रमणको रेकर्ड ब्रेक, एकैदिन ७८ हजार बढी संक्रमित

भारतमा पछिल्लो २४ घण्टामा अहिलेसम्मकै सबैभन्दा धेरै कोरोना संक्रमित थपिएका छन् ।

भारतको स्वास्थ्य मन्त्रालयका अनुसार पछिल्लो २४ घण्टामा ७८ हजार ५१२ नयाँ संक्रममित थपिएका हुन् । संक्रमणबाट २४ घण्टामा ९७१ जनाले ज्यान गुमाएका छन् । यससँगै हालसम्म भारतमा ज्यान गुमाउनेको संख्या ६४ हजार ४६९ पुगेको छ ।

भारतमा हालसम्म कुल संक्रमितको संख्या ३६ लाख २१ हजार २४६ पुगेको छ । जसमध्ये ७ लाख ८१ हजार ९७५ सक्रिय संक्रमित रहेका छन् । २७ लाख ७४ हजार ८०२ जना संक्रमित निको भएर घर फर्किएका छन् ।

पछिल्लो केही दिन यता भारतमा दैनिक ७० हजार भन्दा बढी संक्रमित थपिँदै गएका छन् । तर, पछिल्लो २४ घण्टामा ७८ हजार बढीको मामिला रेकर्ड भएको छ । यो संक्रमणदर अमेरिकामा भन्दा बढी भएको छ ।

नेपालसँग जोडिएका भारतीय राज्य उत्तरप्रदेश र विहारमा कोरोना संक्रमितको संख्या तिब्र गतिमा बढेको छ ।

विश्वभर कोरोना भाइरसबाट साढे दुई करोड भन्दा बढी मानिस संक्रमित भएका छन् ।

जोन हप्किन्स युनिभर्सिटीको तथ्यांक अनुसार विश्वभर कुल संक्रमणको मामिला २ करोड ५१ लाख ३२ हजार ३२० पुगेको छ । ८ लाख बढीको मृत्यु भैसकेको छ ।