बुटवल । यौनिक तथा लैङ्गिक अल्पसङ्ख्यक समुदायको अधिकार सुरक्षाका लागि तीनै तहका सकारले आवश्यक नीति निर्माण र कार्यान्वयनलाई प्राथमिकता दिनुपर्नेमा सरोकारवालाहरुले जोड दिएका छन् ।
समुदायमा रहेको मानवीय विभेद हटाउनका लागि राज्यले साथ नदिँदासम्म सम्भव नभएको उल्लेख गर्दै उनीहरुले राज्यका हरेक तहमा यस विषयको पैरवी आवश्यक रहेको उल्लेख गरे । शाहसी कदम नेपालले विहिबार तिलोत्तमामा आयोजना गरेको यौनिक तथा लैङ्गिक अल्पसङ्ख्यक समुदायको अधिकार, मूल्य र सरोकारवालाहरुसँगको अन्तरक्रियामा सहभागीहरुले समानताको पक्षमा सचेतना आवश्यक रहेको बताए ।
सो अवसरमा बोल्दै तिलोत्तमा नगरपालिका-१ का वडा अध्यक्ष फर्सुराम गिरीले लैङ्गिक अल्पसङ्ख्यकहरुको अधिकार रक्षाका लागि तिलोत्तमा नगरपालिका सधै साथमा रहने प्रतिवद्धता गरे । तिलोत्तमालाई लैङ्गिकमैत्री पालिकाको रुपमा स्थापित गर्ने अभियानमा रहेको बताउँदै उनले सबै समुदायको समान सहभागिता र समान पहुँचको पक्षमा रहेको उल्लेख गरे ।
यसैगरी वडा नम्बर २ का अध्यक्ष डिलबहादुर भट्टराईले राज्यले सबै नागरिकलाई समान हैसियतले व्यवहार गर्ने बताउँदै सामाजिक रुपमा रहेका विभेद हटाउनका लागि सामाजिक संघ–संस्थाहरुले सचेतना अभियानलाई जोड दिनुपर्ने उल्लेख गरे । तिलोत्तमा नगरपालिकाको आर्थिक सहयोगमा आयोजित कार्यक्रममा बोल्ने विभिन्न संघ–संस्थाका प्रतिनिधिहरुले समानता र मानव अधिकार रक्षाका लागि राज्यले सबैभन्दा पहिले भूमिका खेल्नुपर्नेमा जोड दिए ।
शाहसी कदम नेपालका अध्यक्ष अहिसना क्षेत्री, कार्यकारी निर्देशक रेशम न्यौपाने तथा फाइनान्स अफिसर सुरेश थापा लगायतले बोल्दै लैङ्गिक अल्पसङ्ख्यकहरुप्रति गरिने व्यवहार परिवर्तन गर्न आवश्यक रहेको बताए । समाजमा समान हैसितले बाच्ने अधिकार सबै नागरिकलाई हुनुपर्ने बताउँदै उनीहरुले त्यसका लागि आज पनि लडाई लडिरहनुपर्ने बाध्यता रहेको गुनासो गरे ।
प्रतिक्रिया