बुटवल । बुटवल उपमहानगरपालिकाका नगर खेलराज पाण्डेयले हरितालिकाको तीजलाई सबै नारीले समान ढंगबाट मनाउन सक्ने साझा पर्वका रूपमा विकास गर्नुपर्ने बताएका छन् ।
लोकदोहोरी प्रतिष्ठान नेपाल रुपन्देहीले देवीनगर चौपारीमा आयोजना गरेको तिज विशेष कार्यक्रममा शुभकामना व्यक्त गर्दै मेयर पाण्डेयले तिज पर्व अत्यधिक तडकभडकपूर्ण बन्दै जाँदा सामान्य वर्गका महिलाको पहुँच बाहिरिने गरेको बताए । उनले यसलाई सबै नागरिकले सहज रूपमा मनाउन सक्ने खालको पर्व बनाउनुपर्नेमा जोड दिए ।
लोकदोहोरी प्रतिष्ठान नेपाल रुपन्देहीका अध्यक्ष विजय सापकोटाले नेपाली मौलिक संस्कृतिको संरक्षण र जगेर्नाका लागि यस किसिमको कार्यक्रम आयोजना गरिएको बताए । कार्यक्रममा सल्लाहकार खेम हमालसहित विभिन्न अतिथिहरूले पनि तिजका गीतमा सहभागी भई रमाइलो गरेका थिए ।
तीज विशेष कार्यक्रममा कलाकार प्रचण्ड जिसी, बिधान कार्की, सम्झना रणपाल, कोपिला न्यौपाने, दीपक गरौजा मगर, लालमाया थापा, विष्णु सिजाली, विष्णु श्रीपाली, श्रमशु थापा, दुर्गा नेपाल, योगराज पोखरेल, हेमबहादुर सिजाली, रेनु राना लगायतका कलाकारहरूले आकर्षक प्रस्तुति दिएका थिए ।
कार्यक्रमको सञ्चालन सचिव बिधान कार्की र रेशम खनालले गरेका थिए भने स्वागत उपाध्यक्ष रितु थापाले गरेकी थिइन् । कार्यक्रममा स्थानीय जनसमुदायको बाक्लो उपस्थिति रहेको थियो ।
प्रतिक्रिया