धनगढी । डडेल्धुराको नवदुर्गा गाउँपालिका–५ को चौडमा बिहीबार बिहान भएको जिप दुर्घटनामा चार जनाको घटनास्थलमै ज्यान गएको छ ।
उग्रतारा यातायातको से १ ज ७३८ नम्बरको जिप दुर्घटनामा परेर नवदुर्गा–५ का १८ वर्षीय सुरेश साउद, २३ वर्षीय सुरेश पार्की, ४० वर्षीया तारा अवस्थी र ७२ वर्षीया कलावती साउदको मृत्यु भएको प्रहरीले जनाएको छ । दुर्घटनामा परि ४ जनाको घटनास्थलमै मृत्यु भएको सुदूरपश्चिम प्रदेश ट्राफिक प्रहरी कार्यालयका प्रवक्ता प्रहरी नायब उपरीक्षक टेकबहादुर जोराले जानकारी दिए ।
दुर्घटनाबाट अन्य चार जना घाइते भएका छन् । घाइते हुनेमा नवदुर्गा–५ बस्ने १८ वर्षीया सुशिला विक, चार वर्षीया बालिका प्रतिका पार्की, ४८ वर्षीय चन्द्रबहादुर साउद र जिप चालक ३५ वर्षीय रामबहादुर साउद छन् । प्रहरीका अनुसार घाइतेहरुमध्ये सुशिला विक र जिप चालक रामबहादुर साउदको अवस्था गम्भीर छ ।
घाईतेहरुलाईै उपचारका लागि डडेल्धुरा अस्पताल पठाइएको छ । आज बिहान करिब सवा नौ बजेतिर जिप दुर्घटना भएको प्रहरीले अनुमान गरेको छ । जिप सडकबाट करिब पाँच सय मिटर तल खसेको उल्लेख गर्दै जिप दुर्घटनाको कारण भने खुल्न नसकेको प्रहरीको भनाई छ ।
प्रतिक्रिया