धादिङ, चितवन र तनहुँका जोखिमयुक्त सडकमा गाडी चलाउन रोक

काठमाडौं । लगातारको वर्षासँगै पहिरो खस्दा धादिङ, चितवन र तनहुँका जोखिमयुक्त सडकमा आज बिहान ६ बजेदेखि सवारी आवागमन रोकिएको छ ।

धादिङको बेनीघाट रोराङ गाउँपालिका-१० जवाङ खोलामा पहिरो खसेपछि नागढुंगा-मुग्लिन सडकखण्ड बन्द भएको छ । यद्यपि मुग्लिन-नारायणगढ सडकखण्ड भने अहिले दुईतर्फी सञ्चालनमा छ । तर ढुंगा खस्ने क्रम निरन्तर रहेकाले यात्रामा जोखिम भएकै कारण सवारी चलाउन रोक लगाइएको जिल्ला प्रहरी कार्यालय चितवनका प्रवक्ता रविन्द्र खनालले जानकारी दिए ।

मुग्लिन-नारायणगढ सडकअन्तर्गत तुइन खोलामा सानो पहिरो खसेको भए पनि अहिले बाटो खुला रहेको प्रहरीले जनाएको छ । तर सम्भावित जोखिमलाई ध्यानमा राख्दै बिहान ६ बजेदेखि अस्थायी रूपमा सवारी आवागमन रोकिएको जिल्ला प्रहरी कार्यालय चितवनले जारी गरेको सूचनामा उल्लेख छ ।

जिल्ला प्रहरी कार्यालय, धादिङका अनुसार आज बिहान करिब २ बजे जवाङ खोलामा पहिरो खसेपछि राजमार्ग बन्द भएको थियो । स्थानीय, प्रहरी र यात्रुको सहयोगमा बाटो केही समय खुलाइएको भए पनि फेरि बिहान ६ बजे पुनः माथिबाट पहिरो खस्दा सडक दुबै तर्फ अवरुद्ध भएको हो ।

निरन्तर वर्षासँगै ढुंगा-माटो खस्ने क्रम जारी रहेकाले सडक तत्काल खोल्न सकिएको छैन । बारम्बार पहिरो खस्दा यात्रुहरूलाई ठूलो सास्ती भोग्नुपरेको छ ।