देवदह । सिटिजन लाइफ इन्स्योरेन्स कम्पनीको आठौं वार्षिकोत्सव तथा कुकुर तिहारको शुभ अवसरमा कम्पनीको देवदह शाखाले देवदह-१० चरङेस्थित अल केयर नेपालमा रहेका उद्धार गरिएका कुकुरहरूलाई ‘सपोर्ट फर एनिमल रेस्क्यु प्रोग्राम’ अन्तर्गत खाद्यान्न सहयोग गर्दै टीका, माला र पूजा गरेको छ ।
कार्यक्रमको अध्यक्षता सिटिजन लाइफ इन्स्योरेन्सका क्षेत्रीय प्रमुख दुर्गा राज ढकालले गरेका थिए । प्रमुख अतिथिका रूपमा देवदह नगरपालिका-१० का वडा अध्यक्ष एक बहादुर सुनार सहभागी भएका थिए भने, विशेष अतिथिमा देवदह शाखा प्रमुख विनिता श्रीस, फर्साटिकर शाखा प्रमुख उत्तम परियार, बेलबास शाखा प्रमुख योगेन्द्र रायमाझी, र अल केयर नेपालका सञ्चालक दिपक रिजाल उपस्थित थिए ।
कार्यक्रममा उद्धार केन्द्रमा रहेका कुकुरहरूलाई टीका माला लगाएर पूजा गरिएको र उनीहरूलाई खाद्यान्न वितरण गरिएको थियो ।
कार्यक्रममा बोल्दै वडा अध्यक्ष एक बहादुर सुनारले सिटिजन लाइफ इन्स्योरेन्सले कुकुर तिहारजस्तो सांस्कृतिक पर्वमा जनावरप्रति देखाएको माया र सामाजिक उत्तरदायित्वको भाव प्रशंसनीय भएको बताए । सिटिजन लाइफले देखाएको उदाहरणले सबैमा करुणा र सहअस्तित्वको भावना जगाएको उनले बताए ।
सिटिजन लाइफ इन्स्योरेन्सका क्षेत्रीय प्रमुख दुर्गा राज ढकालले सिटिजन लाइफ इन्स्योरेन्स कम्पनीले केवल व्यवसायिक क्षेत्रमा मात्र होइन, समाज र जीवजन्तुका हितमा पनि हातेमालो गर्दै आएको बताए । उनले नागरिकका जीवन बीमासँगै समाज र प्रकृतिको संरक्षणमा पनि सिटिजन लाइफ इन्स्योरेन्स उत्तरदायी रहेको बताए ।
देवदह शाखा प्रमुख विनिता श्रीसले देवदह शाखाले समुदायका लागि सकारात्मक योगदान पुर्याउने उद्देश्यले विभिन्न सामाजिक कार्यक्रमहरू सञ्चालन गर्दै आएको बताइन ।
अल केयर नेपालका सञ्चालक दिपक रिजालले सिटिजन लाइफप्रति आभार व्यक्त गर्दै भने, “यो सहयोग र पूजा कार्यक्रमले उद्धार केन्द्रमा रहेका कुकुरहरूको हेरचाहमा थप सहयोग पुगेको छ । यस्तो कार्यले जनावरप्रतिको माया र सम्मान झल्काउँछ ।”
कार्यक्रमको अन्त्यमा सहभागी अतिथिहरूले केन्द्रमा रहेका कुकुरहरूलाई टीका, माला र खाना खुवाएका थिए ।
प्रतिक्रिया