टाइब्रेकरमा भारतमाथि नेपाल महिला टिमको शानदार जित

काठमाडौं । नेपालले भारतविरुद्ध बुधबार भएको अनौपचारिक महिला राष्ट्रिय टिमबीचको मैत्रीपूर्ण खेलमा टाइब्रेकरमार्फत ३-० ले विजय हासिल गरेको छ । निर्धारित ९० मिनेटको खेल १-१ को बराबरीमा टुंगिएपछि परिणाम टाइब्रेकरबाट निर्धारण गरिएको हो ।

नेपालको जितमा गोलरक्षक अञ्जना रानामगर नायक बनिन् । उनले भारतका दुई प्रहार रोकिन् भने अर्को प्रहार बाहिरिएको थियो । नेपालका तर्फबाट सविता रानामगर, रश्मिकुमारी घिसिङ र निशा थोकरले सफलतापूर्वक गोल गरेका थिए । कप्तान अनिता बस्नेतको प्रहार भने बाहिरिएको थियो ।

खेलको पहिलो हाफमा भारतले सौम्या गुगुलोथको गोलमार्फत ३० औं मिनेटमा अग्रता लिएको थियो । तर पहिलो हाफको इन्जुरी समयमा अनिता बस्नेतको कर्नर प्रहारमा रश्मिकुमारी घिसिङले हेडमार्फत गोल गर्दै नेपाललाई बराबरीमा ल्याएकी थिइन् ।

सिक्किमको पाल्जोर स्टेडियममा सम्पन्न यो खेलसँगै नेपालको भारत भ्रमण टुंगिएको छ । यसअघि थ्री नेसन्स कपमा नेपालले पहिलो खेलमा इरानसँग ३-० ले पराजय बेहोरेको थियो भने दोस्रो खेलमा भारतलाई २-१ ले पराजित गरेको थियो ।