काठमाडौं । नेपाली कांग्रेसको पदाधिकारी बैठक आज बिहान ११ बजे बस्दैछ । पार्टीको केन्द्रीय समिति बैठक सुरु हुनुअघि पदाधिकारी तथा पूर्वपदाधिकारीहरूको बैठक बस्ने तयारी गरिएको हो ।
बैठकमा महामन्त्री गगन थापा र विश्वप्रकाश शर्माले प्रस्तुत गर्ने एजेन्डामाथि छलफल हुने बताइएको छ । उनीहरूले मंसिरभित्र महाधिवेशन सम्पन्न गर्ने कार्यतालिका प्रस्ताव र क्रियाशील सदस्यता विवाद समाधानका विषय बैठकको मुख्य एजेन्डा बनाएका छन् ।
बिहीबारको बैठकमा उक्त एजेन्डा राख्न नसक्ने अवस्था बनेपछि महामन्त्री थापा बिनासूचना अनुपस्थित भएका थिए ।
कांग्रेसभित्र अहिले महाधिवेशनको मिति र प्रक्रियालाई लिएर तीव्र मतभेद देखिएको छ । पार्टीभित्रको संस्थापन पक्ष (शेरबहादुर देउवा नेतृत्व) सरकारले घोषणा गरेको फागुन २१ को निर्वाचनपछि मात्र महाधिवेशन गर्नुपर्ने पक्षमा छ ।
त्यसका विपरीत, संस्थापनइतर समूह मंसिरभित्रै महाधिवेशन सम्पन्न हुनुपर्ने र नभए विशेष महाधिवेशनमा जाने अडानमा रहेको छ ।
नेपाली कांग्रेसको केन्द्रीय समिति बैठक भने दिउँसो १ बजे बस्ने तय गरिएको छ, जसमा आजको पदाधिकारी बैठकमा तय भएका प्रस्तावहरू औपचारिक रूपमा पेश गरिनेछन् ।
प्रतिक्रिया