नेपालगञ्ज । आर्थिक बर्ष २०७५/७६ मा मुलुकभर १७ प्रतिशत बीमाको पहुँच रहेकोमा आर्थिक बर्ष २०८२/८३ को असोजसम्म बीमाको पहुँच बढेर ४९.०५ प्रतिशत पुगेको एक तथ्यांकले देखाएको छ ।
नेपाल बीमा प्राधिकरण लुम्बिनी प्रदेश कार्यालय बुटवलको आयोजना एवम् नेपाल पत्रकार महासंघ बाँकेको समन्वयमा आज नेपालगञ्जमा आयोजित पत्रकारसंग बीमा विषयक अन्तरक्रिया तथा छलफल कार्यक्रममा यस्तो तथ्यांक सार्वजनिक गरिएको हो ।
नेपाल बीमा प्राधिकरण लुम्बिनी प्रदेश कार्यालय का सहायक निर्देशक शिवराज विसीले प्रस्तुत गरेको तथ्यांक अनुसार लुम्बिनी प्रदेशमा सक्रिय बीमालेख संख्या ११ लाख रहेको छ । जसबाट कुल ७ अर्ब ४३ करोड बीमा शुल्क संकलन भएको छ । विसीले नेपालमा जोखिमको अवस्था रहेको भन्दै नेपाल जलबायु परिवर्तनको जोखिममा १०औं, भूकम्पीय जोखिममा ११औं, मिश्रित विपद् १६औं र बाढी पहिरोको जोखिमका हिसाबले विश्वमा ३०औं स्थानमा रहेको जानकारी गराए ।
उनले कानुनी तथा कार्यान्वयन कमजोरी, उच्च जोखिम क्षेत्रहरुमा निगरानीर नियम कमजोर तथा सम्पत्ती सुद्धिकरण र आतंकवाद वित्तिय लगानी रोक्ने प्रयास अपर्याप्त भएका कारण नेपाल ग्रे लिष्टमा गएको बताए । उनले बीमाका ७ सिद्धान्तका बारेमा पनि चर्चा गरेका थिए ।
जेनजी आन्दोलनका क्रममा मात्र बागमती प्रदेशमा सबैभन्दा बढी १७६२ र कर्णाली प्रदेशमा सबै भन्दा कम २९ बीमा दाबी आएको उनले बताए ।
कार्यक्रममा बोल्दै नेपाल बीमा प्राधिकरण बुटवल कार्यालयकी निर्देशक जमुना अर्याल आचार्यले बीमाको बुझाई र धरातलीय यथार्थबारे बुझ्न र सुझाब संकलन गर्न पत्रकारहरुसंग अन्तरक्रिया गरिएको बताइन् । उनले बीमाबारे सचेतना प्रबद्र्धन गर्न र बीमाका मुद्दालाई मिडियामा मूल प्रवाहीकरण गर्न पत्रकारहरुको रचनात्मक सहयोगको अपेक्षा राखिन्।
नेपाल पत्रकार महासंघ लुम्बिनी प्रदेश अध्यक्ष शुक्रऋषि चौलागाईले बीमाको दायरा र पहुँच बढ्दै गएको बताउँदै बीमा बारेको बुझाईमा पनि सुधार भएको बताए ।
नेपाल पत्रकार महासंघ बाँकेका अध्यक्ष नवीन गिरीले आर्थिक क्षतिको भरपाई र सोधभर्नामा बीमाको उल्लेख्य भूमिका रहने बताए । उनले बीमाबारे सर्वसाधारणलाई जानकारी प्रदान गर्न मिडियाको भूमिका रहने भन्दै बीमा बचत मात्र नभएर सुरक्षित भविष्यको आधार पनि भएको बताए ।
कार्यक्रममा पत्रकारहरु निरज गौतम, शंकर खनाल, शरण कर्माचार्य, सावित्री गिरी, लोकनाथ शर्मा, लगायतले बीमाका सम्बन्धमा कतिपय कमजोरीहरु रहेको औंल्याउँदै विभिन्न सुझाव दिएका थिए ।
प्रतिक्रिया