बुटवल । राष्ट्रिय युवा संघ नेपाल रुपन्देही जिल्ला कमिटीले एनसेल कम्पनीको लापरबाही र नियमनविहीन गतिविधिप्रति कडा आपत्ति जनाउँदै बुटवलस्थित एनसेल कार्यालयमा तालाबन्दी गरेको छ । सोमबार जारी गरिएको प्रेस विज्ञप्तिमा संघले एनसेलका गतिविधिले नागरिकको गोपनीयता, सुरक्षा र उपभोक्ता अधिकार उल्लंघन भएको आरोप लगाएको छ ।
संघका अध्यक्ष कृष्णबहादुर कुमालद्वारा जारी विज्ञप्तिमा भनिएको छ कि “न्यायप्रेमी युवाहरू राष्ट्रिय युवा संघमा, सामाजिक परिवर्तन युवाको कार्यमा” भन्ने नारालाई आत्मसात गर्दै संगठनले सार्वजनिक सरोकारका गम्भीर मुद्दामा सशक्त भूमिकासहित क्रियाशील रहँदै आएको छ । लोकतान्त्रिक अधिकार, सामाजिक न्याय र राष्ट्रनिर्माणमा युवा वर्गको सक्रिय सहभागितालाई महत्वपूर्ण ठान्दै संघले एनसेलविरुद्धको कदम उठाएको स्पष्ट पारिएको छ ।
अध्यक्ष कुमालका अनुसार एनसेलले पछिल्लो समय उपभोक्तामाथि अन्यायपूर्ण व्यवहार गर्दै अनियन्त्रित तरिकाले व्यक्तिगत मोबाइल डाटा तथा कलसम्बन्धी गोपनीय जानकारी दुरुपयोग गरेको संकेत देखिएको र यसले आम नागरिकमा असन्तोष र अविश्वास बढाएको छ । उनले भने, “नागरिकको सुरक्षासँग प्रत्यक्ष जोडिने संवेदनशील विषयमा एनसेल गैरजिम्मेवार बनेको छ । त्यसैले बुटवलस्थित अफिसमा तालाबन्दी गर्नुपर्ने बाध्यता आएको हो ।”
संघले पीडित पक्षले न्याय नपाएसम्म र कम्पनीले आफ्नो नीति तथा सेवा सुधारमा ठोस कदम नचालेसम्म तालाबन्दी नखोल्ने चेतावनी दिएको छ । साथै, आगामी दिनमा पनि एनसेलले जनतामाथि दुरुपयोगपूर्ण कार्य दोहोर्याए आवश्यक परे थप कडा कदम चालिने संघले जनाएको छ ।
राष्ट्रिय युवा संघ नेपाल रुपन्देही जिल्ला कमिटीले दूरसञ्चार क्षेत्रमा पारदर्शिता, उपभोक्ता संरक्षण र सामाजिक उत्तरदायित्व सुनिश्चित गर्न सरकार तथा सम्बन्धित निकायलाई आवश्यक पहल गर्न आग्रह गरेको छ ।
प्रतिक्रिया