बुटवल । दूरसञ्चार सेवा प्रदायक एनसेलको गम्भीर लापरबाहीका कारण बुटवलका एक युवा ठगीको ठूलो जालोमा फसेका छन् । असम्बन्धित व्यक्तिलाई ई-सीम जारी भएपछि बुटवल-११ का समुद्र श्रेष्ठबाट विभिन्न बैंक खाताबाट ५ लाख ७१ हजार रुपैयाँ निकालिएको खुलासा भएको छ । घटना सार्वजनिक भएपछि स्थानीय युवा तथा पीडितले सोमबार बुटवलस्थित एनसेल सेन्टरमा ताला लगाइ विरोध जनाएका छन् ।
पीडित श्रेष्ठका अनुसार उनले विदेश जानका लागि आवश्यक पासपोर्ट, नागरिकता र अन्य कागजातको प्रतिलिपि अनलाइनमार्फत पठाएका थिए । ‘जीवन पौडेल’ नाम प्रयोग गरेका व्यक्तिले आफ्नो कामका लागि कागजात मागेपछि १५ दिनसम्म निरन्तर भइरहेको कुराकानीले उनी विश्वासमा परेका थिए । तर, सोही कागजात प्रयोग गरेर स्क्यामरले श्रेष्ठको नाममा रहेको एनसेल नम्बरको ई-सीम प्राप्त गरेपछि उक्त सीममार्फत विभिन्न बैंक खाताबाट रकम चोरी गरेका हुन् ।
श्रेष्ठले शुक्रबार (मंसिर १९) साँझ आफ्नो फिजिकल सीम अचानक बन्द भएपछि शंका लागेको र एनसेल अफिसमा सम्पर्क गर्दा आफूले प्रयोग गर्दै आएको नम्बरमा पहिले नै ई-सीम जारी भइसकेको जानकारी मात्र प्राप्त भएको बताए ।
विदेश भ्रमणको लामो अनुभव बोकेका श्रेष्ठ यसपटक स्वीजरल्याण्ड जाने तयारीमा थिए । तर, ठगीमा संलग्न भनिएका जीवन पौडेल घटनापछि सम्पर्कविहिन भएका छन् । पीडित पक्षले ई-सीम जारी गर्न मद्दत गरेको भन्दै एनसेलका स्थानीय वितरक मनिष क्षेत्रीविरुद्ध पनि कारबाहीको माग गरेका छन् ।
यसबारे प्रतिक्रिया माग्दा एनसेल क्षेत्रीय कार्यालय बुटवलका बिजनेस हेड विनय डंगोलले घटनाबारे आफूहरूसमक्ष विवरण नआएको बताउँदै, आधिकारिक प्रतिक्रिया केन्द्रीय कार्यालयले मात्र दिने जानकारी दिए । उनले पत्रकारहरूलाई आवश्यक तथ्य प्राप्त भएपछि जानकारी गराइने आश्वासन समेत दिए ।
घटनाबारे ईलाका प्रहरी कार्यालय बुटवलका डिएसपी इन्द्र रानाले सोमबार दर्ता भएको उजुरीका आधारमा प्रारम्भिक अनुसन्धान अघि बढाइएकाले दोषी पहिचान तथा कारबाही प्रक्रियामा प्रहरीले काम गरिरहेको बताए ।
यो पनि पढ्नुहोस
प्रतिक्रिया