बुटवल । अंग्रेजी नयाँ वर्षको अवसर पारेर बुटवलमा आजदेखि तीन दिने ‘बुटवल सडक खाना महोत्सव’ सुरु हुँदैछ । होटल तथा रेष्टुरेन्ट व्यवसायी संघ रुपन्देहीको आयोजनामा तथा बुटवल उपमहानगरपालिकाको संरक्षकत्वमा आयोजना हुने महोत्सव आज (१५ गते) देखि १७ गतेसम्म सञ्चालन हुनेछ ।
बुटवल-९ स्थित तिनकुने चोकदेखि बसपार्क चोकसम्म फैलिने महोत्सवमा ‘सडकमै खाऔं, सडकमै रमाऔं’ भन्ने नारासहित विविध स्वाद र संस्कृतिको संगम प्रस्तुत गरिने आयोजकले जनाएको छ । महोत्सवमा स्थानीय तथा रैथाने परिकार, विभिन्न जातजातिका मौलिक खानाका परिकारसँगै स्वदेशी तथा विदेशी स्वादका परिकारहरू उपलब्ध हुनेछन् ।
होटल तथा रेष्टुरेन्ट व्यवसायी संघ रुपन्देहीका अध्यक्ष माधवकुमार खनालका अनुसार महोत्सवका लागि सडकको बीच भागमै अत्याधुनिक स्टल निर्माण गरिएको छ । यसले आगन्तुकलाई सहज, सुरक्षित र आकर्षक वातावरणमा खानाको स्वाद लिन सक्ने अवसर प्रदान गर्नेछ ।
महोत्सवमा खानाका परिकारसँगै विविध सांस्कृतिक कार्यक्रम, स्थानीय तथा राष्ट्रिय कलाकारहरूको प्रस्तुति रहने संघका वरिष्ठ उपाध्यक्ष तथा स्टल बुकिङ तथा वितरण एवं स्वागत सत्कार उपसमिति संयोजक अर्जुन थापाले जानकारी दिए । उनका अनुसार यसले बुटवलको सांस्कृतिक पहिचान उजागर गर्नुका साथै आन्तरिक पर्यटन प्रवर्द्धनमा समेत महत्वपूर्ण योगदान पुर्याउनेछ । स्थानीय खानाका परिकारको प्रवर्द्धन, कला-संस्कृतिको संरक्षण तथा पर्यटन प्रवर्द्धन महोत्सवको प्रमुख उद्देश्य रहेको संघले जनाएको छ । बुटवललाई पर्यटकीय गन्तव्यका रूपमा थप चिनाउने उद्देश्यले महोत्सव स्थलमा विभिन्न पर्यटकीय स्थल झल्किने सेल्फी जोन निर्माण गरिनेछ भने पर्यटन प्रवर्द्धनसम्बन्धी गोष्ठीसमेत आयोजना गरिनेछ ।
महोत्सवमा करिब ६० वटा खाना स्टल रहने संघका महासचिव तथा महोत्सवका सदस्य सचिव केशव कँडेलले जानकारी दिए । साथै सामाजिक उत्तरदायित्वअन्तर्गत महोत्सव अवधिभर निःशुल्क स्वास्थ्य परीक्षण सेवा सञ्चालन गरिने र अन्तिम दिन रक्तदान कार्यक्रम समेत आयोजना गरिने उनले बताए ।
महोत्सव उद्घाटनको पूर्वसन्ध्यामा आज दिउँसो साढे ३ बजे नयाँ बसपार्कबाट विभिन्न जातजातिको सांस्कृतिक पहिचान झल्किने झाँकीसहितको र्याली आयोजना गरिने संघका प्रथम उपाध्यक्ष थम्मन भण्डारीले जानकारी दिए । संघले २०७५ सालदेखि निरन्तर रूपमा सडक खाना महोत्सव आयोजना गर्दै आएको छ ।
प्रतिक्रिया