सिन्धुपाल्चोक । भोटेकोसी गाउँपालिकाका विद्यार्थीहरूलाई न्यानो लुगा तथा शैक्षिक सामग्री वितरण गर्दै ‘पाण्डा प्याक परियोजना’ कार्यान्वयन गरिएको छ ।
चाइना फाउन्डेसन फर रुलर डेभलपमेन्ट ( सीएफआरडी) द्वारा संचालित उक्त परियोजनाले चिसो र भौगोलिक रूपमा चुनौतीपूर्ण क्षेत्रमा अध्ययनरत बालबालिकाको सिकाइ अवस्था र स्वास्थ्य सुरक्षालाई सुदृढ बनाउने उद्देश्य लिएको छ ।
नेपालमा सामाजिक रूपमा बहिष्कृत तथा सीमान्तकृत समुदायका बालबालिकाले अझै पनि गुणस्तरीय शिक्षामा पहुँच पाउन कठिनाइ भोग्दै आएका छन् । विद्यालयमा न्यून सहभागिता, सिकाइमा सहयोगको कमी तथा आर्थिक अभाव जस्ता समस्याले उनीहरूको शैक्षिक प्रगति प्रभावित बनाउँदै आएको पृष्ठभूमिमा उक्त परियोजना सञ्चालन गरिएको हो ।
कार्यक्रम अन्तर्गत भोटेकोसी गाउँपालिकाका वडा नं. १ देखि ५ सम्म रहेका २९ विद्यालय समेटिएका छन् । ईसीडीदेखि कक्षा ५ सम्मका विद्यार्थीहरूलाई एकसेट ट्र्याकसुट, एकजोर पञ्जा, एकजोर मोजा, एक मफलर र एकटोपी सहितको ‘न्यानो पोशाक प्याकेज’ वितरण गरिएको छ । केही विद्यालयमा वितरण सकिएको छ भने बाँकी विद्यालयमा वितरण कार्य जारी छ ।
वडा नं. ५ स्थित मर्मिङ माध्यमिक विद्यालयमा आयोजित औपचारिक वितरण समारोहमा सीआरडीएफका कन्ट्री डाइरेक्टरको उपस्थितिमा यो कार्यक्रम आयोजना गरिएको थियो । कार्यक्रममा सीआरडीएफका प्रतिनिधि, कार्यान्वयनकर्ता संस्था ग्लोबल कोअपरेशन फर डेभलपमेन्ट (जीसीडी)का अध्यक्ष तथा प्रतिनिधि, विद्यालय प्रमुख, शिक्षक, विद्यालय व्यवस्थापन समिति, वडा अध्यक्ष, शिक्षा शाखाका प्रतिनिधि, अभिभावक तथा विद्यार्थीहरूको उपस्थिति रहेको थियो ।
न्यानो पोशाकसहितको प्याकेज प्राप्त गर्दा विद्यार्थीहरू अत्यन्त उत्साहित र खुसी देखिन्थे । विद्यालयका प्रधानध्यापकले समुदायका बालबालिकाका लागि अत्यधिक आवश्यक कार्यक्रम ल्याइदिनुमा गहिरो आभार प्रकट गरे ।
कार्यक्रममा सीआरडीएफकी कन्ट्री निर्देशक झोउ झिचियाङ (Zou Zhiqiang)ले संस्थाले नेपालमा विभिन्न कार्यक्रममार्फत निरन्तर रूपमा शैक्षिक सहयोग प्रदान गर्दै आएको बताइन् । पाण्डा प्याक परियोजना चिसो तथा दुर्गम क्षेत्रका बालबालिकाको जीवनस्तर र सिकाइ वातावरण सुधार गर्ने संस्थाको दीर्घकालीन प्रतिबद्धताको प्रतिबिम्ब भएको उनको भनाइ थियो ।
जीसीडीका अध्यक्ष मुक्ति मरासिनीले कार्यक्रमको तयारीदेखि वितरण चरणसम्मको यात्रा अर्थपूर्ण र सकारात्मक रहेको बताए । स्थान छनोट, स्थानीय सरकारसँग समन्वय, विद्यालयहरूसँग सहकार्य तथा कर्मचारीहरूको समर्पित लगनशीलताबाट कार्यक्रम सफल भएको उनले उल्लेख गरे ।
त्यसैगरी, भोटेकोसी गाउँपालिकाका शिक्षा शाखा प्रमुख बिनेश कुमार श्रेष्ठले यस्तो किसिमका कार्यक्रमले बालबालिकाको हौसला वृद्धि गर्ने तथा स्थानीय सरकार र संस्थाबीच सहकार्य सुदृढ बनाउने बताए । दुर्गम भौगोलिक र सीमित साधनस्रोत भएका परिवारका बालबालिकासम्म सहयोग पुगेको देख्दा आफू अत्यन्त आभारी भएको उनले बताए ।
समुदाय र सरोकारवालाको सक्रिय सहभागितासहित सम्पन्न पाण्डा प्याक परियोजनाले विद्यार्थीहरूलाई प्रत्यक्ष लाभ पु-याएको र स्थानीय तहमा सहकार्यको संस्कृतिलाई अझ सुदृढ बनाएको बताइएको छ ।
प्रतिक्रिया