दुबई । इरान र इजरायल-अमेरिका गठबन्धनबीचको सैन्य तनाव खाडी क्षेत्रका अन्य मुलुकहरूमा समेत फैलिएको छ । बढ्दो द्वन्द्वका कारण यस क्षेत्रको हवाई यातायात गम्भीर रूपमा प्रभावित भएको छ ।
इरानले खाडी क्षेत्रका विभिन्न स्थानमा ‘प्रतिशोधात्मक’ आक्रमण सुरु गरेको दाबी भइरहेका बेला संयुक्त अरब इमिरेट्स (यूएई) र साउदी अरब गन्तव्यका दर्जनौँ अन्तर्राष्ट्रिय उडानहरू बीचैबाट मोडिएका छन् ।
उडानहरूको प्रत्यक्ष अनुगमन गर्ने संस्था ‘फ्लाइट राडर’ का अनुसार अबुधाबीका लागि उडेका इतिहाद एयरलाइन्स का दुई विमानलाई ओमानको राजधानी मस्कटतर्फ मोडिएको छ । त्यसैगरी दुबई गन्तव्य रहेको इमिरेट्स को एक विमान भारतको मुम्बई फर्काइएको जनाइएको छ ।
साउदी अरबको राजधानी रियादस्थित किङ खालिद अन्तर्राष्ट्रिय विमानस्थलमा अवतरण गर्न लागेका केही विमानलाई ‘होल्ड’मा राखिएको छ भने कतिपय उडानहरू प्रस्थानस्थलतर्फै फर्किएका छन् ।
रियादस्थित अमेरिकी दूतावासमा ड्रोन आक्रमण
रियादस्थित अमेरिकी दूतावास रियादमा ड्रोन आक्रमण भएको रिपोर्ट सार्वजनिक भएको छ । प्रारम्भिक विवरणअनुसार दूतावास परिसरमा केही क्षति पुगेको बताइएको छ । इरानले खाडी क्षेत्रमा रहेका अमेरिकी सैन्य र कूटनीतिक संरचनालाई निशाना बनाउने चेतावनी दिएपछि उक्त घटना भएको जनाइएको छ ।
नेपाली यात्रु अलपत्र
यूएई र साउदी अरब नेपाली श्रमिकका प्रमुख गन्तव्य मुलुक हुन् । हालका उडान अवरोधका कारण वैदेशिक रोजगारीमा जाने तथा स्वदेश फर्कने तयारीमा रहेका सयौँ नेपाली विभिन्न अन्तर्राष्ट्रिय विमानस्थलमा अलपत्र परेका छन् । केही विमान सेवा प्रदायकहरूले आफ्नो उडान तालिका अनिश्चितकालका लागि स्थगित गरेका छन् ।
मध्यपूर्वमा बढ्दो तनावले विश्वकै व्यस्त हवाई मार्गमध्ये एक मानिने खाडी क्षेत्रको आकाश असुरक्षित बनेको विश्लेषण गरिएको छ । यसको प्रत्यक्ष असर अन्तर्राष्ट्रिय व्यापार, आपूर्ति श्रृंखला र यात्रु आवागमनमा परेको छ ।
प्रतिक्रिया