काठमाडौं । सरकारले राष्ट्रिय योजना आयोगको उपाध्यक्षमा गुणाकर भट्टलाई नियुक्त गरेको छ । मंगलबार बसेको मन्त्रिपरिषद् बैठकले भट्टलाई उक्त पदमा नियुक्त गर्ने निर्णय गरेको हो ।
भट्ट लामो समय नेपाल राष्ट्र बैंकमा कार्यरत रही कार्यकारी निर्देशक पदबाट अवकाश प्राप्त गरेका अर्थशास्त्री हुन् । करिब २५ वर्षको सेवाकालमा उनले आर्थिक अनुसन्धान, बैंकिङ नियमन, सुपरिवेक्षण, भुक्तानी प्रणाली तथा राष्ट्र ऋण व्यवस्थापनजस्ता महत्वपूर्ण विभागहरूको नेतृत्व सम्हालेका थिए । साथै, उनी लामो समयसम्म राष्ट्र बैंकको प्रवक्ताको जिम्मेवारीमा पनि रहे ।
डोटीको शिखर नगरपालिका-१ मा जन्मिएका भट्टले त्रिभुवन विश्वविद्यालयबाट स्नातकोत्तर तहमा स्वर्ण पदक हासिल गरेका छन् । उनले अमेरिकाको विलियम्स कलेजबाट स्नातकोत्तर तथा वेन स्टेट विश्वविद्यालयबाट अर्थशास्त्रमा विद्यावारिधि उपाधि प्राप्त गरेका छन् ।
उनको अध्ययन तथा अनुसन्धान क्षेत्र मौद्रिक अर्थशास्त्र, वित्तीय अर्थशास्त्र र विकास अर्थशास्त्रमा केन्द्रित रहेको छ । उनले विभिन्न राष्ट्रिय तथा अन्तर्राष्ट्रिय जर्नलहरूमा अनुसन्धानमूलक लेखहरू प्रकाशित गरेका छन् ।
भट्टले राष्ट्र बैंकमा रहँदा बैंकिङ सुपरिवेक्षण सुदृढीकरण, भुक्तानी प्रणाली सुधार तथा मौद्रिक नीति निर्माणमा महत्वपूर्ण योगदान दिएका थिए । उनको नेतृत्वमा आर्थिक अनुसन्धान विभागले देशका आर्थिक सूचकहरूको विश्लेषण र पूर्वानुमानमा उल्लेखनीय भूमिका खेलेको थियो ।
अब बालेन्द्र शाह नेतृत्वको सरकारले उनलाई राष्ट्रिय नीति तथा योजना निर्माणको महत्वपूर्ण जिम्मेवारी सुम्पिएको छ ।
प्रतिक्रिया