बुटवल । सिद्धबाबा मन्दिर विकास समिति तिनाउ-३, दोभान पाल्पाको अध्यक्षमा अरविन्द पाण्डेय निर्वाचित भएका छन् । वार्षिक साधारणसभा तथा अधिवेशनबाट पाण्डेयको अध्यक्षतामा १७ सदस्यीय कार्यसमिति सर्वसम्मत चयन गरिएको हो ।
समितिको उपाध्यक्षमा शेरजंग थापा, सचिवमा बिष्णु प्रसाद पाण्डेय, सहसचिवमा कुमारी खड्का र कोषाध्यक्षमा तोया लम्साल चयन भएका छन् । सदस्यहरूमा सन्तोष शेरचन, रामबहादुर थापा, दुर्गा श्रेष्ठ, नयना क्षेत्री, कमल श्रेष्ठ, वर्षा रायमाझी, नारायण प्रसाद घिमिरे र चित्रबहादुर थापा रहेका छन् ।
निर्वाचन समितिका संयोजक महेन्द्र पाण्डेका अनुसार कार्यसमितिमा पारदर्शिता कायम गर्न पालिकाबाट ७ जना, राजनीतिक दलबाट ६ जना, पुजारीबाट २ जना र २ जना मनोनित गरी १७ सदस्यीय संरचना बनाइएको हो ।
कार्यक्रममा संस्थाका अध्यक्ष सन्तोषकुमार शेरचनले वार्षिक प्रगति विवरण प्रस्तुत गर्दै आफ्नो कार्यकालमा भएका विकास निर्माणका गतिविधिबारे जानकारी गराए ।
साधारणसभाको उद्घाटन गर्दै तिनाउ गाउँपालिकाका अध्यक्ष प्रेम श्रेष्ठले सिद्धबाबा धामलाई पर्यटनको प्रमुख गन्तव्यका रूपमा विकास गर्न सकिने सम्भावना औंल्याए। उनले मन्दिर व्यवस्थापनमा समयको सदुपयोग महत्वपूर्ण हुने उल्लेख गरे ।
कार्यक्रममा समितिका उपाध्यक्ष लालबहादुर थापा र सल्लाहकार दलबहादुर गुरुङले सिद्धबाबा क्षेत्रलाई धार्मिक पर्यटन केन्द्रका रूपमा विकास गर्ने दीर्घकालीन योजना बनाउन सुझाव दिएका थिए ।
कोषाध्यक्ष कुमारी खड्काले आर्थिक वर्ष ०८१/०८२ मा संस्थाको आम्दानी १ करोड ७ लाख रुपैयाँ र खर्च ९६ लाख रुपैयाँ रहेको विवरण प्रस्तुत गरिन् ।
प्रतिक्रिया