काठमाडौं । नेपाल कम्युनिस्ट पार्टी (एमाले)ले राष्ट्रिय स्वतन्त्र पार्टीलाई वैचारिक रूपमा असंगत र लोकप्रियतावादी राजनीतिक शक्तिका रूपमा उदाएको टिप्पणी गरेको छ ।
मंगलबार प्रतिनिधिसभा बैठकमा बोल्दै एमाले संसदीय दलका नेता रामबहादुर थापाले रास्वपा कुनै वैज्ञानिक विचारधारामा आधारित राजनीतिक दल नभई आकस्मिक रूपमा बनेको महत्वाकांक्षी र अराजक समूहहरूको अस्थायी गठबन्धन भएको बताए ।
थापाले रास्वपाको राजनीतिक आधार लोकप्रियतावाद, भ्रम र विरोधाभासमा टिकेको आरोप लगाए । “यो बाहिरबाट आकर्षक देखिए पनि परिणामका हिसाबले घातक प्रवृत्ति हो,” उनले भने, “यो ग्ल्यामर र स्टन्टमार्फत राजनीति गर्ने शैली हो ।”
उनले रास्वपा चरम अवसरवादी र अस्थिर राजनीतिक प्रवृत्तिको प्रतिनिधि भएको दाबी गर्दै त्यसको उदय परम्परागत दलहरूको कमजोरी, सामाजिक सञ्जाल, एआई र अल्गोरिदमको प्रभाव तथा अन्तर्राष्ट्रिय भू–राजनीतिक परिस्थितिको परिणाम भएको टिप्पणी गरे ।
प्रतिनिधिसभा तथा संघीय सरकारमा प्रभाव स्थापित गरेपछि रास्वपाले संसद्को अधिवेशन स्थगित गरेर अध्यादेशमार्फत शासन सञ्चालन गरेको आरोप पनि उनले लगाए । बादलका अनुसार त्यसको उद्देश्य प्रशासन र न्याय प्रणालीमा एकल प्रभाव कायम गर्नु थियो ।
उनले रास्वपाको राजनीतिक लक्ष्य आगामी स्थानीय तह, प्रदेश र संघीय निर्वाचनमा एकल नेतृत्व स्थापित गर्नु रहेको उल्लेख गर्दै त्यसलाई ‘कथित निलो क्रान्ति’ को रणनीतिसँग जोडे ।
बादलले रास्वपाको सफलतालाई जनताको लामो संघर्ष, बलिदान वा वैचारिक परिपक्वताबाट प्राप्त उपलब्धि नभई परिस्थितिजन्य राजनीतिक उभारको परिणाम भएको दाबी गरे ।
प्रतिक्रिया