बुटवल । सम्भाव्य धर्ना र घेराउका कारण सांसदहरु संसद भवन प्रवेशमा अवरोध हुन सक्ने सम्भावनाको आँकलन गर्दै नेपाल कम्युनिष्ट पार्टी नेकपाको प्रदेश ५ संसदीय दलले सोमबार बिहानै ७ बजे संसदीय दलको बैठक बोलाएको छ ।
संसद भवन नेकपा संसदीय दलको कार्यालयमा बोलाइएको र दलको बैठकमा ७ बजे बैठकमा उपस्थित हुन सुचना गरिएको एक प्रदेशसभा सदस्यले जानकारी दिए ।
कार्यसुची अनुसार प्रदेशको स्थायी राजधानी तोक्नका लागि सरकारले पेश गरेको प्रस्तावमा सोमबार छलफल हुने कार्यक्रम रहेको छ ।
छलफलमा भाग लिन संसद भवन पुग्न अवरोध हुन सक्ने सम्भावनालाई ध्यानमा राखेर बिहानै सांसदहरुलाई संसद भवनमा भित्र पु-याउन बैठक बोलाइएको नेकपा संसदीय दल स्रोतले उल्लेख गरेको छ ।
शनिबार मुख्यमन्त्री निवासमा बसेको दलको बैठकमा फरक मत दर्ज गरेका सांसदहरुले आजको दलको बैठक बहिस्कार गर्ने सम्भावना रहेको पार्टी स्रोतले खबरकुरालाई बताएको छ ।
सरकारको प्रस्तावमा फरक मत दर्ज गरेका नेकपा सभासद भोजप्रसाद श्रेष्ठले आफु दलको बैठकमा सहभागि नहुने संकेत गरेका छन् । ‘संसदभवनमा म जान्न, घेराबन्दीमा बसेर के गर्ने ?’ उनले भने । संसदमा सरकारको प्रस्तावको कडा प्रतिबाद हुने सांसद श्रेष्ठले संकेत गरे । नाजायज तरिकाले सरकारले प्रस्ताव गरेको भन्दै उनले सहमतिमा गर्न सकिने बिषयलाई सरकारले असहमतितर्फ उन्मुख गरेको आरोप लगाए ।
सरकारको गलत शैलीका कारण जनतामा आक्रोश आएको श्रेष्ठको भनाई छ ।
प्रतिक्रिया