बुटवल । पूर्वाधार विकास तथा निर्माणका काममा स्वदेशी उत्पादनको प्रयोगलाई प्राथमिकता दिनुपर्नेमा विज्ञहरूले जोड दिएका छन् । नेपालमै उत्पादन हुने सिमेन्ट तथा कंक्रिटको प्रयोग बढाएर पूँजी पलायन रोक्न र रोजगारी सिर्जनामा टेवा पुर्याउन सकिने उनीहरूको भनाइ छ ।
सिमेन्ट उत्पादक संघ नेपालले बुधबार बुटवलमा आयोजना गरेको ‘सडकका लागि बलियो फुटपाथको डिजाइन र निर्माण’ विषयक अन्तरक्रियामा सहभागीहरूले सडक तथा अन्य भौतिक पूर्वाधार निर्माणमा स्वदेशी सामग्रीको प्रयोग विस्तार गर्नुपर्ने धारणा राखेका हुन् ।
कार्यक्रममा बोल्दै राष्ट्रिय योजना आयोगका सदस्य इञ्जिनियर अर्जुनजंग थापाले नेपाली उत्पादनलाई प्रोत्साहन गर्ने उद्देश्यले सडक निर्माणमा सिमेन्टको प्रयोग क्रमशः बढाइँदै लगिएको बताए । दाउन्ने क्षेत्रमा निर्माणाधीन करिब ११ किलोमिटर सडक तथा सिद्धबाबा सुरुङमार्ग क्षेत्रमा ढलान सडक निर्माणमा सिमेन्ट प्रयोग गरिएको उल्लेख गर्दै उनले आगामी दिनमा यसको प्रयोग अझ विस्तार गरिने बताए ।
थापाले सिद्धार्थ राजमार्गअन्तर्गत बुटवल–पोखरा सडक विस्तार आयोजना यसै आर्थिक वर्षभित्र टेन्डर प्रक्रियामा जाने जानकारी पनि दिए । पुरानो डिजाइनअनुसार अघि बढ्ने वा नयाँ डिजाइन तयार गर्ने विषयमा छलफल भइरहेको उल्लेख गर्दै उनले परियोजना कार्यान्वयनको तयारी अन्तिम चरणमा पुगेको बताए ।
उनले बुटवल–रानीमहल–कालिगण्डकी करिडोर हुँदै मुक्तिनाथसम्मको सडक मार्गलाई छोटो दूरीको विकल्पका रूपमा विकास गर्ने सम्भावनाबारे पनि सरकार स्तरमा छलफल भइरहेको जानकारी दिए ।
कार्यक्रममा बुटवल उपमहानगरपालिकाका प्रमुख खेलराज पाण्डेयले बुटवललाई केन्द्रमा राखेर नजिकका पर्यटकीय गन्तव्यसम्म सहज पहुँच विस्तार गर्नुपर्ने आवश्यकता औँल्याए । मुक्तिनाथसम्मको यात्रालाई सहज बनाउने गरी सडक पूर्वाधार विस्तार गर्न संघीय सरकारसँग आग्रह गर्दै उनले गुणस्तरीय र दीर्घकालीन सडक निर्माणका लागि बिटुमिनको विकल्पका रूपमा सिमेन्ट ढलान प्रविधिलाई प्राथमिकता दिनुपर्ने बताए ।
स्थानीय पूर्वाधार विकास विभागका महानिर्देशक इञ्जिनियर अशोककुमार साह, सिमेन्ट उत्पादक संघ नेपालका अध्यक्ष ध्रुवनन्दन मारु तथा नेपाल इञ्जिनियर्स एसोसिएसन लुम्बिनी प्रदेश अध्यक्ष महेश्वर लम्सालले नेपाललाई सिमेन्ट र काठ उत्पादनको केन्द्रका रूपमा विकास गर्नुपर्नेमा जोड दिए ।
उनीहरूले अन्तर्राष्ट्रिय बजारमा बिटुमिनको मूल्य निरन्तर बढ्दै गएकाले सडक निर्माणमा सिमेन्ट र कंक्रिटको प्रयोग बढाउनु समयको आवश्यकता भएको बताए । गुणस्तर, टिकाउपन र दीर्घकालीन लागतका दृष्टिले पनि ढलान सडक उपयुक्त हुने उल्लेख गर्दै उनीहरूले यसका लागि सरकारी नीतिमा आवश्यक सुधार गर्नुपर्ने धारणा राखे ।
प्रतिक्रिया