टिकटकर तुल्सा अधिकारी पुर्पक्षका लागि थुनामा

काठमाडौं । सामाजिक सञ्जालमा ‘तुल्सा कलेक्सन’ नामले परिचित टिकटकर तुल्सा अधिकारीलाई जिल्ला अदालत ललितपुरले पुर्पक्षका लागि थुनामा पठाउने आदेश दिएको छ । बिहीबार न्यायाधीश टेकनाथ गौतमको इजलासले सम्पत्ति शुद्धीकरण (मनी लाउन्डरिङ), संगठित अपराध तथा आपराधिक लाभ (एक्सटर्सन) सम्बन्धी मुद्दामा सुनुवाइ गर्दै अधिकारीलाई थुनामा पठाउने आदेश दिएको हो ।

तुल्सा अधिकारीसहित १० जनाविरुद्ध जिल्ला सरकारी वकिल कार्यालयले मुद्दा दायर गरेको थियो । उक्त मुद्दाको आधार ललितपुरका व्यवसायी कुमार चिमोरियाले दिएको जाहेरी बनेको थियो ।

चिमोरियाले २०८२ साउन २४ गते जिल्ला प्रहरी परिसर ललितपुरमा जाहेरी दिँदै अधिकारीले विभिन्न व्यवसायिक तथा लगानीका नाममा आफूबाट ६ करोड ५२ लाख २९ हजार ७५ रुपैयाँ लिएर दायित्व पूरा नगरेको आरोप लगाएका थिए । सोही जाहेरीका आधारमा प्रहरीले अनुसन्धान अघि बढाएको थियो ।

अनुसन्धानका क्रममा बैंक कारोबार विवरण, सम्पत्ति अभिलेख, डिजिटल प्रमाण तथा सम्बन्धित व्यक्तिहरूको बयान संकलन गरिएको थियो । त्यसपछि अधिकारीविरुद्ध ठगी, संगठित अपराध र सम्पत्ति शुद्धीकरणसम्बन्धी मुद्दा दायर गरिएको थियो ।

अदालतमा भएको बयानका क्रममा अधिकारीले आफूविरुद्ध लगाइएका आरोप अस्वीकार गरेकी थिइन् । उनले चिमोरियासँगको आर्थिक कारोबार आफ्नो नभई ‘विष्णु’ नामका व्यापारिक साझेदारसँग सम्बन्धित रहेको दाबी गरेकी थिइन् । साथै, आफूलाई ठगी प्रकरणमा जोडिनु अन्यायपूर्ण भएको जिकिरसमेत गरेकी थिइन् ।

यद्यपि अभियोजन पक्षले विभिन्न आर्थिक प्रमाण, कारोबार विवरण तथा कागजातका आधारमा अधिकारीको संलग्नता पुष्टि हुने दाबी गरेको थियो ।

प्रहरी अनुसन्धानका क्रममा अधिकारी तथा उनीसँग सम्बन्धित व्यक्तिहरूको नाममा रहेको करिब २१ करोड रुपैयाँ बराबरको सम्पत्तिको वैधानिक स्रोत पुष्टि हुन नसकेको पाइएको छ । उक्त सम्पत्तिमा नगद, बैंक मौज्दात, घरजग्गा, सवारीसाधन तथा विभिन्न लगानी समावेश रहेको जनाइएको छ ।

सम्पत्तिको स्रोतबारे सन्तोषजनक प्रमाण पेश हुन नसकेपछि उनीविरुद्ध सम्पत्ति शुद्धीकरणसम्बन्धी मुद्दासमेत चलाइएको हो । नेपालको कानुनअनुसार वैधानिक स्रोत पुष्टि गर्न नसकिएको सम्पत्तिमाथि अनुसन्धान गर्न सकिने तथा अदालतले अवैध ठहर गरेमा त्यस्ता सम्पत्ति जफत हुन सक्ने व्यवस्था रहेको छ ।