काठमाडौं । परराष्ट्रमन्त्री शिशिर खनाल भारतको तीनदिने औपचारिक भ्रमणका क्रममा शुक्रबार नयाँदिल्ली पुगेका छन् ।
भारतीय विदेशमन्त्री डा. एस. जयशंकरको निमन्त्रणामा भारत पुगेका मन्त्री खनाललाई नयाँदिल्लीस्थित इन्दिरा गान्धी अन्तर्राष्ट्रिय विमानस्थलमा भारतका लागि नेपाली कार्यवाहक राजदूत डा. सुरेन्द्र थापा र भारतीय विदेश मन्त्रालयका अतिरिक्त सचिव मुनु महावरले स्वागत गरेका थिए ।
भ्रमणका क्रममा मन्त्री खनालले आफ्ना भारतीय समकक्षी डा. जयशंकरसँग औपचारिक द्विपक्षीय वार्ता गर्ने कार्यक्रम रहेको छ । साथै भारत सरकारका अन्य उच्चपदस्थ अधिकारीहरूसँग पनि भेटघाट गर्ने कार्यतालिका तय गरिएको छ ।
वार्तामा नेपाल-भारत सम्बन्ध, व्यापार, लगानी, ऊर्जा, कनेक्टिभिटी तथा आपसी हितका विविध विषयमा छलफल हुने अपेक्षा गरिएको छ ।
परराष्ट्र मन्त्रालयका अनुसार नियमित उच्चस्तरीय भ्रमण आदानप्रदानको निरन्तरताका रूपमा भइरहेको यस भ्रमणले नेपाल-भारतबीचको ऐतिहासिक, सांस्कृतिक तथा बहुआयामिक सम्बन्धलाई थप मजबुत बनाउन सहयोग पुग्ने विश्वास गरिएको छ ।
प्रतिक्रिया