काठमाडौं । नेपाली कांग्रेसको केन्द्रीय कार्यसमिति बैठक आज बस्दैछ । पार्टीका कार्यवाहक मुख्य सचिव कृष्णप्रसाद दुलालका अनुसार बैठक दिउँसो १ बजे केन्द्रीय कार्यालय सानेपामा बस्नेछ ।
बैठकमा केन्द्रीय कार्यसमितिका पदाधिकारी तथा सदस्यलाई अनिवार्य उपस्थित हुन भनिएको छ । बैठकमा पार्टीभित्रको संस्थापन इतर समूहले बोलाएको राष्ट्रिय भेला, आगामी महाधिवेशन तथा पार्टीको आधिकारिकतासम्बन्धी सर्वोच्च अदालतको पछिल्लो निर्णयलगायत विषयमा छलफल हुने जनाइएको छ ।
बैठक कम्तीमा दुई दिनसम्म चल्ने बताइएको छ । संस्थापन इतर समूहले यही साउन २९ गते राष्ट्रिय भेला आयोजना गर्ने घोषणा गरेपछि कांग्रेसले त्यस विषयमा छलफल गर्न केन्द्रीय कार्यसमिति बैठक बोलाएको हो ।
पार्टी नेतृत्वले आपसी एकताका लागि ठोस पहल नगरेको भन्दै संस्थापन इतर समूहले नयाँ दल गठन गरेर अघि बढ्ने तयारी गरिरहेको थियो । तर, सर्वोच्च अदालतले पार्टीको आधिकारिकतासम्बन्धी विषयमा पुनरावलोकनको बाटो खुला गरेपछि इतर पक्ष केही पछि हटेको बताइएको छ ।
बैठकमा पार्टीभित्र देखिएको असन्तुष्टि समाधान, संगठनात्मक एकता कायम गर्ने उपाय तथा आगामी महाधिवेशनको तयारीका विषयमा समेत छलफल हुने अपेक्षा गरिएको छ ।
प्रतिक्रिया