काठमाडौं । पूर्वप्रधानमन्त्री एवं नेपाली कांग्रेसका पूर्वसभापति शेरबहादुर देउवा लामो समयको विदेश बसाइपछि आज बुधबार नेपाल फर्किन लागेका छन् । उपचारका क्रममा करिब पाँच महिनादेखि विदेशमा रहेका देउवा हङकङबाट नेपालका लागि प्रस्थान गरेका हुन् ।
देउवा उपचारका लागि लामो समय सिंगापुर र हङकङमा बसेका थिए । पछिल्लो समय हङकङमा रहेर स्वास्थ्य उपचार तथा फलोअप गराइरहेका देउवा यसअघि हङकङबाट थाइल्यान्डको राजधानी बैंकक हुँदै नेपाल फर्किने तयारीमा थिए । तर, पछिल्लो समय उनको यात्रा कार्यक्रम परिवर्तन भएको हो ।
देउवा आज हङकङबाट नेपालका लागि प्रस्थान गरेको उनका निकट नेताहरूले बताएका छन् । लामो समयदेखि विदेशमा रहेका देउवाको स्वदेश फर्काइलाई नेपाली कांग्रेसभित्र पनि चासोका साथ हेरिएको छ । कांग्रेसको संस्थापन इतर समूहले काठमाडौंमा राष्ट्रिय भेला आयोजना गर्ने तयारी गरिरहेका बेला देउवा स्वदेश फर्किन लागेका हुन् ।
यसअघि जेनजी आन्दोलनका क्रममा गत भदौ २४ गते बुढानीलकण्ठस्थित देउवा निवासमा आगजनी भएको थियो । सो क्रममा देउवा दम्पतीमाथि समेत आक्रमण भएको थियो । त्यसपछि केही समय नेपालमै उपचार गराएपछि देउवा र उनकी पत्नी आरजु राणा देउवा थप उपचारका लागि सिंगापुर गएका थिए ।
प्रतिक्रिया