बागमतीका मुख्यमन्त्री थापामगरले पाए विश्वासको मत

हेटौँडा । बागमती प्रदेशका मुख्यमन्त्री किरण थापामगरले प्रदेशसभाबाट विश्वासको मत प्राप्त गरेका छन् । मंगलबार प्रदेशसभामा उनले राखेको विश्वासको मतसम्बन्धी प्रस्तावको पक्षमा ५७ सांसदले मतदान गरेका हुन् ।

१०४ सदस्यीय प्रदेशसभामा सरकार गठनका लागि ५३ सांसदको समर्थन आवश्यक पर्छ । आजको मतदानमा ५८ सांसद सहभागी भएकामा मुख्यमन्त्रीको प्रस्तावको पक्षमा ५७ मत परेको थियो । एक मत विपक्षमा परेको छ ।

मुख्यमन्त्री थापामगरले नेपालको संविधानको धारा १६८ को उपधारा (९) तथा बागमती प्रदेशसभा नियमावली, २०७४ को नियम १४३ बमोजिम विश्वासको मत लिएका हुन् ।

मुख्यमन्त्रीको प्रस्तावको पक्षमा नेकपा एमालेका २४, नेकपाका २६ र राष्ट्रिय प्रजातन्त्र पार्टी (राप्रपा)का ७ सांसदले मतदान गरेका थिए । एमाले, नेकपा र राप्रपाको एकपक्ष गठबन्धनमा बागमतीमा नयाँ सरकार गठन भएको हो ।

मुख्यमन्त्रीले विश्वासको मत लिने प्रयोजनका लागि बोलाइएको प्रदेशसभा बैठकमा प्रतिपक्षी दलका सांसदहरू अनुपस्थित भएका थिए । नेपाली कांग्रेसका ३६, नेपाल मजदुर किसान पार्टी (नेमकिपा)का ३ र हाम्रो नेपाली पार्टी (हानेपा)का २ गरी ४१ सांसदले बैठक बहिष्कार गरेका थिए । राप्रपाका बाँकी पाँच सदस्य बैठकमै उपस्थित भएनन् ।