नेताहरुको इगोले कुच्चिएका नेकपा र काँग्रेस : बस्दैनन् निर्धारित समयमा कहिल्यै बैठक

काठमाडौं । देशका दुई मुख्य राजनीतिक दलहरुको आन्तरिक विवादले ती दलको संगठनात्मक कार्यक्षमता ह्रास हुँदै गएको देखिएको छ ।

सत्तारुढ नेपाल कम्युनिष्ट पार्टी नेकपाको विवाद पार्टी फुटकै अवस्थामा पुगेको छ । कुनै राजनीति, दर्शन र सिद्धान्त भन्दा पनि शिर्ष नेतृत्वबीच व्यक्तित्वको टकराव र स्वास्र्थका कारण देखिएको विवादले उग्र रुप लिँदा नेकपा राजनीतिक पार्टी नभएर यौटा संयुक्त मोर्चा जस्तो देखिएको छ ।

वर्ष २०७७ भित्र मात्रै नेकपामा अहिलेसहित तीन पटक ठूलो आन्तरिक झगडा भएको छ । अघिल्ला दुई पटकसम्म युद्ध विराम गरेका नेताहरुले यसपटक के गर्छन् त्यो हेर्न भने बाँकी नै छ ।

अध्यक्षद्वय केपी शर्मा ओली र पुष्पकमल दाहाल प्रचण्ड एवं माधव कुमार नेपाल पक्षबीचको गुटगत लडाईं अहिले संसदको विशेष अधिवेशन आह्वानका लागि हस्ताक्षर संकलन र गुटगत भेला एवं एक अर्कोलाई नंग्याउने अवस्थासम्म पुगेको छ । दुवै गुटहरु यतिबेला पार्टी विभाजनको फायर कसले पहिला खोल्ने भन्ने तम्तयार अवस्थामा मात्रै रहेका छन् ।

अर्कोतिर, प्रमुख प्रतिपक्षी नेपाली काँग्रेसको अवस्था पनि नेकपाको जस्तै नै छ । आफुलाई प्रजातन्त्रको एकमात्र ठेकेदार ठान्ने नेपाली काँग्रेसभित्र प्रजातान्त्रिक अभ्यास समाप्त हुँदा राजनीतिक र वैचारिक र सांगठनिक रुपमा पार्टी खिईंदै गएको छ भने शिर्ष नेतृत्व बीचको झगडाले पार्टी गतिहिन भएको छ ।

सभापति शेरबहादुर देउवा र वरिष्ठ नेता रामचन्द्र पौडेलबीचको टकरावले आगामी महाधिवेशन समेत प्रभावित हुने देखिन्छ । काँग्रेसको बैठक पनि बारम्बार बोलाउने र स्थगित गर्ने हुँदै आएको छ, नेकपाको जस्तै ।

नेकपामा यसअघि ओली र प्रचण्डलाई रहर लाग्दा बैठक बस्ने गरेको थियो । अहिले पार्टीका कार्यकारी अध्यक्ष बैठकको आग्रह गर्दै अर्का अध्यक्षसँग विन्ती बिसाउनुपर्ने अवस्था आइसकेको छ ।

काँग्रेसमा सभापति देउवाले इच्छाएको समयमा मात्रै बैठक बस्ने प्रवृत्ति छ । पार्टी दुई विपरित विचारधाराका भए पनि कार्यशैली नेकपा र काँग्रेसका नेताहरुको यौटै रहेको छ ।

काँग्रेसले आज सोमबारका लागि बोलाएको केन्द्रीय कार्यसमिति बैठक फेरि कात्तिक २७ गतेसम्मका लागि स्थगित गरेको छ । गत असोज १९ गते बोलाइएको बैठक कोरोना संक्रमणका कारण स्थागित गरेको काँग्रेसले फेरि कात्तिक २१ गते बैठक बोलाएको थियो । त्यो बैठक पनि पुनः आजका लागि सारिएकोमा अब फेरि २७ गतेलाई सारिएको छ । सोमबार दिउँसो १ बजेका लागि तय भएको बैठक २७ गते बिहीबार दिउँसो १ बजे बस्ने गरी सरेको पार्टीका मुख्यसचिव कृष्णप्रसाद पौडेलले बताएका छन् ।

गत असोज १२ गते मा वरिष्ठ नेता रामचन्द्र पौडेलसहित २७ केन्द्रीय सदस्यले सभापति देउवाको कार्यशैलीप्रति असन्तुष्टि जनाउँदै १६ बुँदे विरोध पत्र दर्ता गरेपछि काँग्रेस विवाद पनि उत्कर्षमा पुगेको थियो । यद्यपी, काँग्रेसले सो पत्रबारे पार्टीका पदाधिकारी तथा पूर्वपदाधिकारीसँग पटकपटक छलफल गरेको छ । आइतबार बसेको पदाधिकारी बैठकले सभापति देउवाले गठन गरेका विभागलाई यथावत राख्दै क्रियशील सदस्यता तथा समायोजन लगायतका एजेन्डामा सहमतिको प्रस्ताव आउँदो केन्द्रीय कार्यसमितिमा पेश गर्ने समझदारी गरेको छ ।

उता, कात्तिक १५ गतेदेखि १७ गतेसम्मका लागि बोलाइएको नेकपा केन्द्रीय कमिटिको बैठक यसअघि नै मंसिर १५–१७ का लागि सारिएको छ । तर, अध्यक्षद्वय ओली र प्रचण्डबीच बढेको कटुताका कारण सचिवालय बैठक समेत बस्न नसकेकेको अवस्थामा नेकपाको मंसिरे बैठक पनि हुनेसम्भावना क्षिण बन्दै गएको छ ।