बुटवल । बुटवल उपमहानगरपालिकामा कार्यरत इन्जिनियर सुमन श्रेष्ठको राष्ट्रिय स्वतन्त्र पार्टी (रास्वपा) को महाधिवेशन स्थलमा उपस्थित भएको फोटो सार्वजनिक भएपछि श्रेष्ठ राजनीतिक विवादमा तानिएका छन् । रास्वपाको महाधिवेशन स्थलमा उनको फोटो सार्वजनिक भएसँगै उनी विवादमा तानिएका हुन् ।
रास्वपाले सरकारी कर्मचारीलाई पार्टीमा आबद्ध नगराउने नीति रहेको बताउँदै आएको छ । रास्वपाको राजनीतिक मुक्त कर्मचारीको नीति अनुरुप सरकारले कर्मचारीहरुको ट्रेड युनियन समेत खारेज गरिसकेको छ । रास्वपाले पार्टी समर्थक कर्मचारीको संगठन समेत निर्माण गरेको छैन ।
बुटवल उपमहानगरपालिकाको भवन निर्माण महाशाखामा प्राविधिकतर्फ अधिकृत आठौँ पदमा कार्यरत श्रेष्ठ महाधिवेशनमा सहभागी भएको फोटो सार्वजनिक भएपछि भने त्यस विषयले फरक चर्चा पाएको हो ।
इन्जिनियर श्रेष्ठले भने आफु चितवन भएर बुटवल फर्कने क्रममा महाधिवेशन स्थलमा हेर्न मात्र गएको बताएका छन् । खबरकुरासँग कुरा गर्दै श्रेष्ठले आफु रास्वपाको सदस्य वा प्रतिनिधि भएर महाधिवेशन स्थल नगएको बताउँदै उदघाटन कार्यक्रम हेर्न मात्र पुगेको बताए । ‘म रास्वपाको सदस्य वा प्रतिनिधि भएर गएको होइन, बाटोमा आउँदै गर्दा महाधिवेशनस्थल हेर्न मात्र पुगेको हुँ,’ उनले भने, ‘साथीहरुले फोटो खिचेर राखिदिएछन् ।’
उनले रास्वपा प्रवेश नगरेको स्पष्टिकरण दिएपनि भित्रभित्रै रास्वपाबाट आगामी स्थानीय चुनावमा मेयरको उम्मेदवारको तयारी गरिरहेको उनी निकट स्रोतको दाबी छ । कर्मचारी रहेकै अवस्थामा श्रेष्ठले गोप्यरुपमा रास्वपाका लागि काम गरिरहेको स्रोतको भनाई छ ।
इन्जिनियर श्रेष्ठसँगै बुटवलमा एमालेको प्रभावशाली नेताकारुपमा रहेको प्रदेशसभा सदस्य भोजप्रसाद श्रेष्ठका सुपुत्र सुनिल श्रेष्ठपनि महाधिवेशनमा सहभागी भएको फोटो सार्वजनिक भएको छ ।
प्रतिक्रिया