आजबाट बूढानीलकण्ठ मन्दिर खुला गरिँदै

काठमाडौं । कोरोनाभाइस संक्रमणका कारण नौ महीनादेखि भक्तजनका लागि बन्द गरिएको बूढानीलकण्ठ नारायणस्थान मन्दिर आइतबारदेखि खुला गरिने भएको छ । बिहान ८ बजे विशेष कार्यक्रम र पूजा गरी मन्दिर भक्तजनका लागि खुला गरिँदैछ ।

कोरोना सङ्क्रमण बढ्न थालेपछि सरकारले गत वर्ष ११ चैतमा बन्दाबन्दी लगाएकै दिनदेखि भक्तजनका लागि मन्दिर बन्द थियो ।

आजदेखि भने भक्तजनका लागि भौतिक दूरी कायम गरी स्वास्थ्य सुरक्षाका विधि अपनाएर खुला गर्न लागिएको बूढानीलकण्ठ नारायणस्थान दशनामी मठका मठाधीश महन्त स्वामी निगमानन्दले जानकारी दिए ।

उनका अनुसार आज बिहान ८ः१५ बजे मन्दिरमा आयोजना गरिने कार्यक्रममा वाग्मती प्रदेशसभा सदस्य दीपक निरौला र बूढानीलकण्ठ नगरपालिकाका मेयर उद्धवप्रसाद खरेलले मन्दिर भक्तजनका लागि पनि खुला गरिएको घोषणा गर्नेछन् । मन्दिर बन्द हुँदा पनि नित्य पूजा, आरती भने नियमति भइरहेको छ ।

मन्दिरमा चतुर्मासा, कार्तिक शुक्ल एकादशीदेखि पूर्णिमासम्म लाग्ने मेला भने यस वर्ष कोरोनाका कारण स्थगित गरिएको थियो । बुढानीलकण्ठमा हरि र हर अर्थात् विष्णु र शिव दुवै भगवान् रहेको धार्मिक विश्वास छ ।

गएको वर्ष ११ चैतदेखि नै बन्द रहेको पशुपतिनाथ मन्दिर १ पुसदेखि नै भक्तजनका लागि खुला गरिसकिएको छ । पशुपतिनाथमा पनि मास्क अनिवार्य गरिएको छ । भक्तजनले भौतिक दूरी कायम गरेर स्वास्थ्यका अन्य मापदण्ड पनि पूरा गर्नुपर्नेछ ।