बार्सिलोना । स्टार खेलाडी लियोनेल मेस्सी बिनानै मैदानमा उत्रेको बार्सिलोनाले १० खेलाडीमा सिमित मालागामाथि २–० को सहज जित निकालेको छ ।
तेस्रो सन्तानको जन्मपछि २७ लिग खेलमा २४ गोल गरेका मेस्सीले शनिबारको खेलबाट नाम फिर्ता लिएका थिए ।
तर, मेस्सीको अनुपस्थितिमा लुइस सुवारेजले खेलको १५ औँ मिनेटमा गोल गर्दै बार्सालाई अग्रता दिलाए ।
खेलको २८ औँ मिनेटमा काउन्टिन्होले अग्रता दोब्बर बनाए ।
लगत्तै जोर्डी अल्बालाई फल हानेपछि सामु गार्सियाले रातो कार्ड खाँदै मैदान छाड्नु परेको थियो ।
करिब एक घण्टा १० खेलाडीमा सिमित बनेपनि मालागाले त्यसपछि भने कुनै गोल खाएन ।
बार्सिलोना पछिल्ला ३५ ला लिगा खेलहरुमा अपराजित रहेको छ । जसमा उसले २९ मा जीत र ६ मा बराबरी गरेको छ । यसअघि रियल सोसिडाडले सन् १९८० मा लगतार ३८ खेलमा अपराजित रहेर स्पेनिस किर्तिमान बनाएको थियो ।
जीतसँगै बार्सिलोनाले शीर्ष स्थानमा ११ अंकको अग्रता बनाउन सफल भएको छ ।
अब बार्सिलोनाले बुधबार च्याम्पियन्स लिगको अन्तिम १६ को खेलको दोस्रो लेगका लागि चेल्सीको आतिथ्य गर्नेछ । पहिलो लेगका स्टामफोर्ड ब्रिजमा १–१ को बराबरीमा सकिएको थियो ।
मेस्सीलाई सन्तान सुख
यता, मेस्सी र उनकी पत्नी एन्टोनेला रोकुजोलाई तेस्रो सन्तान भएको छ ।
इन्सटाग्राममा नयाँ सन्तानको आगमनको घोषणा गर्दै मेस्सीले लेखेका छन्, ‘स्वागत छ सिरो, भगवानलाई धन्यवाद । सबै राम्रो भयो । ऊ र आमा दुवै राम्रो गरिरहेका छन् । हामी अत्यन्त खुसी छौँ ।’
प्रतिक्रिया