काठमाडौं । नेकपाको प्रचण्ड-नेपाल पक्षले प्रधानमन्त्री केपी शर्मा ओलीलाई पूर्वप्रधानन्यायाधीशहरुलाई धम्क्याएको भन्दै आपत्ति जनाएको छ ।
आइतबार साँझ बसेको सचिवालय बैठकले पूर्वप्रधानन्यायाधीशहरुले नागरिकको हैसियतमा बोल्दा प्रधानमन्त्रीले अपमानित गर्ने र धम्क्याउने काम गरेको ठहर गर्दै प्रधानन्त्रीको पदमा बसेर नागरिकको हैसियतले धारणा राख्ने न्यायाधीसलाई धम्कीपूर्ण भाषा प्रयोग गर्नु आपत्तिको कुरा भएको स्पष्ट पारेको छ ।
बैठकको बिषयमा जानकारी दिँदै पार्टी प्रवक्ता नारायणकाजी श्रेष्ठ (प्रकाश)ले हरेक नागरिकले आफ्नो विचार राख्न पाउने स्वतन्त्रता र संवैधानिक हकको सम्मान गर्न प्रधानमन्त्रीलाई आग्रह गरे ।
संसद विघटनबारे पूर्वप्रधानन्यायाधीशहरु मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीले पूर्व प्रधानन्यायाधीस समूहको नामबाट बिज्ञप्ति जारी गरेको भन्दै प्रधानमन्त्री ओलीले आपत्ति जनाएका छन् । आइतबार मात्र राष्ट्रियसभामा प्रधानमन्त्री ओलीले अदालतको काममा बाधा गरेको भन्दै प्रधानन्यायाधीसहरुलाई त्यसो नगर्न चेतावनी दिएका थिए ।
बैठकले सरकारी सञ्चार माध्यमहरु एउटा गुटको पर्चा जस्तो भएको भन्दै बिरोध जनाएको छ । प्रवक्ता श्रेष्ठले सरकारी स्रोत साधनको दुरुपयोग गर्न बन्द गर्न आग्रह गरे ।
प्रतिक्रिया