काठमाडौं । नेपाल कम्युनिष्ट पार्टी नेकपाको प्रचण्ड-नेपाल पक्षले प्रधानमन्त्री केपी शर्मा ओलीलाई तीन दिनभित्र स्पष्टीकरण दिन पत्र पठाएको छ ।
गत शुक्रबार बसेको प्रचण्ड नेपाल पक्षको स्थायी कमिटी बैठकले पार्टी अनुशासन उल्लंघन गरेको भन्दै ओलीलाई साधारणसदस्य समेत नरहने गरी कारवाही गर्न स्पष्टीकरण सोध्ने निर्णय गरेको थियो ।
सोही निर्णय अनुसार तयार पारिएको पत्र बोकेर स्थायी कमिटी सदस्य सुरेन्द्र पाण्डे र कार्यालय सचिव श्रीराम ढकालले सोमबार बालुवाटार पुगेर गेटमा पत्र बुझाएका छन् । पत्रमा ओलीलाई कारवाही गर्नुपर्नाको कारण सोधिएको छ ।
नेताद्वय पाण्डे र ढकाल पत्र बुझाउन पुगेपछि सुरक्षाकर्मीले सचिवालयलाई खबर गरेका थिए । भित्रबाट पत्र बुझ्न भनेपछि मात्र गेटका सुरक्षाकर्मीले पत्र बुझेका थिए ।
प्रधानमन्त्री ओलीले गत पुष ५ गते पार्टीको निर्णय विना प्रतिनिधिसभा विघटन गरेपछि नेकपामा सोही दिनदेखि विभाजन आएको थियो । त्यसपछि एक पक्षको नेतृत्व प्रचण्ड र माधव नेपालले गरिरहेका छन् भने अर्को पक्षको नेतृत्व ओलीले गरेका छन् ।
साविकको नेकपाको ४४१ सदस्यीय केन्द्रीय कमिटीमा प्रचण्ड नेपालको पक्षमा २९७ जना केन्द्रीय सदस्यहरु रहेका छन् । ओलीले भने पुष ७ गते विधान संशोधन गर्दै १५ सय बढीको केन्द्रीय कमिटी (महाधिवेशन आयोजक कमिटी) बनाएका छन् ।
नेकपाको वैधानिकताको कानूनी विवाद निर्वाचन आयोगमा पुगेर अड्किएको छ ।
प्रतिक्रिया