अधिकारकर्मीको प्रदर्शनमा प्रहरीको धरपकड, २४ बढी अधिकारकर्मी पक्राउ

काठमाडौं । प्रधानमन्त्री केपी ओलीको प्रतिनिधिसभा विघटन गर्ने कदमविरुद्ध प्रदर्शनमा उत्रिएका अधिकारकर्मीहरुलाई प्रहरीले धरपकड गर्दै पक्राउ गरेको छ । प्रधानमन्त्रीको सरकारी निवास बालुवाटार अगाडि प्रदर्शनमा उत्रिएका मानवअधिकारकर्मीमाथि प्रहरीले धरपकड गर्दै पक्राउ गरेको हो ।

प्रदर्शनका क्रममा प्रहरीले मानव अधिकार तथा शान्ति समाजका संस्थापक सभापति कृष्ण पहाडी, कृष्ण कंडेल सहित दुई दर्जन अधिकारकर्मीलाई पक्राउ गरेको छ । पक्राउ परेका अधिकारकर्मीलाई अहिले नेपाल पुलिस क्लबमा राखिएको छ ।

प्रधानमन्त्री ओलीले असंवैधानिक ढंगले संसद विघटन गरेको तथा आफूबिरोधी व्यक्ति तथा संस्थालाई आपत्तिजनक अभिव्यक्ति दिनुका साथै अदालत, कानुन ब्यवसायी, पूर्व प्रधानन्यायाधीसहरुलाई अपमानजनक शब्दमा गालीगलौज गरेको भन्दै शान्ति समाजले सोमबार बालुवाटार अगाडि प्रदर्शन गरेको थियो ।

सरकारविरुद्ध नागरिक समाजले सोमबारै बालुवाटार मार्च गर्ने कार्यक्रम पनि रहेको छ ।