दल दर्ता प्रक्रिया अगाडि बढाउन निर्वाचन आयोगलाई ओली पक्षको आग्रह

काठमाडौं । निर्वाचन आयोगले छलफलका लागि बोलाएपछि आयोग पुगेका नेकपा ओली पक्षका नेताहरुले दल दर्ता प्रक्रिया अगाडि बढाउन निर्वाचन आयोगलाई आग्रह गरेर फर्केका छन् ।

दुई अलग अलग दलको अस्तित्व स्विकार नगरेपनि दुई दललाई अलग अलग पत्र पठाएर दल दर्ता र निर्वाचनको तयारीका क्रममा हालसम्म भएका कामबारे छलफल गर्न छलफलका लागि बोलाएको बैठकमा प्रचण्ड(नेपाल पक्ष उपस्थित नभएपनि ओली पक्षका नेताहरु भने छलफलका लागि आयोग पुगेका थिए । प्रचण्ड–नेपाल पक्षका नेताहरुले अध्यक्षद्धय राजनीतिक कार्यक्रमका लागि बाहिर भएकाले माघ १८ गतेपछि मात्र छलफलमा आउन सक्ने लिखित जानकारी दिएर बैठकमा अनुपस्थित भएका थिए ।

ओली पक्षबाट महासचिव विष्णु पौडेल, सुवास नेम्वाङ लगायतका नेताहरुले भने आयोगका पदाधिकारीहरुसँग सर्वोच्च अदालतले अन्तरिम आदेश जारी नगरेकाले निर्वाचन प्रक्रिया अगाडि बढाउन आयोगलाई आग्रह गरेका थिए ।

आयोगबाट फर्कनै क्रममा ओली पक्षका नेता सुवास नेम्वाङले आयोगले सर्वोच्चले अन्यथा आदेश नगरेमा तोकिएकै समयमा चुनाव गर्न प्रतिबद्ध रहेको जनाएको सञ्चारकर्मीहरुलाई बताए ।

‘आधिकारिताबारे आयोगले टुंगो लगाइसकेको छ । त्यसैअनुसार अगाडि बढेका छौं ।नेम्वाङले भने, केही साथीहरुलाई हामी आधिकारिक हौं भन्ने लागेको छ । निर्वाचनबाट सबै टुंगो हुन्छ ।’

निर्वाचन आयोगले राजनीतिक दलसम्बन्धी ऐनको दफा ५१ अनुसार दुवै पक्षले विवरण हेरफेरका लागि गरेको आग्रहलाई अस्वीकार गरिसकेको छ । दुवै पक्षलाई त्यसको जानकारीसमेत पठाएको थियो ।