काठमाडौं । नेपाली राजनीतिमा हलचल मच्चाएको प्रधानमन्त्री निवास बालुवाटारसंग गाँसिएको ललिता निवास प्रहरणमा लामो अनुसन्धान पछि अख्तियारले विशेष अदालतमा मुद्दा दायर गरेको छ । ललिता निवासको जग्गा हिनामिना प्रकरणका मुख्य अभियुक्त शोभाकान्त ढकाल विरुद्ध मुद्दा दायर गरेको हो ।
ढकालमाथि ललिता निवासको २९९ रोपनी सरकारी जग्गा हिनामिना गर्ने कार्यमा मुख्य भूमिका खेलेको अभियोगमा अख्तियार दुरुपयोग अनुसन्धान आयोगले मुद्दा दर्ता गरेको छ । उक्त मुद्दामाथि प्रारम्भिक सुनुवाइ गर्दै विशेष अदालतले ढकाललाई पुर्पक्षका लागि थुनामा पठाउने आदेश दिएको छ ।
विशेष अदालतका न्यायाधीशहरू अब्दुल अजिज मुसलमान, बालेन्द्र रूपाखेती र चन्द्रबहादुर सारूको संयुक्त इजलासले बुधबार साँझ अभियुक्त ढकालसँग बयान लिएका थिए । अख्तियारले दायर गरेको मुद्दामा ढकालविरुद्ध ३९ करोड २८ लाख बिगो मागदाबी गरिएको छ ।
जग्गा प्रकरणमै अभियुक्त बनाइएकी ढकालकी पत्नी उमाकुमारीलाई भने विशेष अदालतले धरौटीमा रिहा गर्ने निर्णय सुनाएको थियो । अख्तियारको उनीमाथि ९१ लाख बिगो मागदाबी थियो ।
प्रतिक्रिया