चीनले नेपाललाई अनुदानमा दिने खोप ८ लाख डोज पु-यायो

काठमाडौं । चीनले नेपाललाई कोभिड-१९ विरुद्ध दिने खोपको मात्रा बढाएको छ ।

नेपालका लागि चिनियाँ राजदूत होउ यान्छीले सोमबार एक विज्ञप्ति जारी गर्दै नेपाललाई आठ लाख डोज खोप उपलब्ध गराउने घोषणा गरेको हो।

राजदूत यान्छीले कोरोना विरूद्धको संघर्षमा नेपाललाई सघाउन पाउँदा खुशी भएको जनाएकी छिन् । अब नेपालले चीनबाट आठ लाख डोज खोप प्राप्त गर्नेछ ।

चिनियाँ दूतावासले सुरूमा तीन लाख डोज खोप अनुदान घोषणा गरेको थियो । त्यसको केही दिनपछि परराष्ट्रमन्त्री प्रदीप ज्ञवाली र चिनियाँ समकक्षी वाङ यी बीचभएको टेलिफोन वार्तापछि चीनले थप दुई लाख डोज खोप दिने प्रतिवद्धता जनाएको थियो ।

चीनको सिनोफार्म कम्पनीले तयार पारेको कोरोना विरूद्धको खोप ‘भेरोसेल’ले नेपालमा आपतकालीन प्रयोग अनुमति यसअघि नै पाईसकेको छ ।

पाकिस्तान, यूएई लगायतका मुलुकमा चिनियाँ कम्पनी सिनोफार्मको कोरोना खोपको आपतकालीन प्रयोग सुरु भैसकेको छ । सिनोफार्मको खोप ७९ प्रतिशत प्रभावकारी रहेको बताइएको छ ।