बर्दियामा बाघको आक्रमणबाट फेरि अर्की एक महिलाको मृत्यु

बर्दिया । बर्दिया मधुवन नगरपालिका –३ मा बाघको आक्रमणबाट मृत्यु भएको घटना सेलाउन नपाउँदै फेरि बाघको आक्रमणबाट अर्कि एक महिलाको मृत्यु भएको छ ।

बर्दिया राष्ट्रिय निकुञ्जको मुख्य क्षेत्र भित्र नै ठाकुरबाबा नगरपालिका –७ मोहनपुर बस्ने ६२ बर्षिया डल्ली रावतको बाघले आक्रमणबाट मृत्यु भएको हो ।

निकुञ्जको बघौरा फाँटामा उनलाई बाघले आक्रमण गरेको थियो । निकुञ्ज भित्र घाँस दाउरा काट्न गएको बेलामा उनलाई बेपत्ता पारेको बर्दिया राष्ट्रिय निकुञ्जले जनाएको छ । उनीसँगै घाँस दाउरा काट्न गएका महिलाहरु गाउँमा आएर बाघले आक्रमण गरी लगेको खबर गरेपछि रावतको खोजीकार्य सुरु भएको थियो ।

निकुञ्जका कर्मचारी, नेपाली सेना र प्रहरीको टोलीले रावतलाई खोज्दै जाँदा मृत अवस्थामा फेला परेको जिल्ला प्रहरी कार्यालयका प्रहरी नायव उपरीक्षक हेमबहादुर शाहीले बताएका छन् । उनको शव पोष्टमार्टमका लागि बर्दिया अस्पतालमा लगिएको छ ।