तिलोत्तमा । पामिर इन्टरनेशनल एकेडेमी तिलोत्तमा–२ जानकीनगरले आफ्नो १२ औं वार्षिकोत्सवका अवसरमा आयोजना गरेको आयोजना गरेको जिल्लास्तरीय अन्तर विद्यालय तेक्वान्दो प्रतियोगितामा लुम्बिनी बोर्डिङ स्कुल च्याम्पियन भएको छ । ३ स्वर्ण र १ रजत पदक जित्दै लुम्बिनी बोर्डिङ च्याम्पियन भएको हो ।
त्यस्तै ३ स्वर्ण र ३ कास्यपदक जित्दै तिनाउ बोर्डिङ स्कुल दोस्रो भएको छ भने आयोजक पामिर एकेडेमी १ स्वर्ण, ३ रजत र ३ कास्य पदक जित्दै तेस्रो भएको छ । प्रतियोगितामा पामिरकी खुस्बु थापा उत्कृष्ट छात्रा तथा इडन बोर्डिङका अर्जुन मगर उत्कृष्ट छात्रबाट पुरस्कृत भएका छन् ।
छात्रछात्रा दुई विधामा २० केजी, २५ केजी, ३० केजी, ३५ केजी र ४० केजी समूहमा प्रतियोगिता गराइएको थियो । सहभागी विद्यार्थीहरुले १० स्वर्णका लागि प्रतिष्पर्धा गरेका थिए ।
प्रतियोगितामा लुम्बिनी बोर्डिङ, पामिर एकेडेमी, साइनिङ स्टार, बुटवल पब्लिक स्कुल, तिनाउ इङलिस स्कुल, इडन इङलिस स्कुल, ज्ञानपुञ्ज इङलिस स्कुल, स्कलर्सहोम बोर्डिङ स्कुल, गणेश पव्लिक, एम्स, बुद्धदिप र सिद्धार्थ बोर्डिङ स्कुलले भाग लिएका थिए । प्रतियोगिताको उदघाटन गर्दै तिलोत्तमा नगर खेलकुद विकास समितिका अध्यक्ष राजेन्द्र गुरुङले विद्यार्थीहरुको शारीरिक र मानसिक विकासका लागि खेल अपरिहार्य रहेको बताउनुभयो ।
कार्यक्रममा विद्यालय व्यवस्थापन समितिका अध्यक्ष मोहन चापागाईले विद्यालयले खेलकुद प्रतियोगिताका साथै विभिन्न अतिरिक्त क्रियाकलापमा जोड दिंदै आएको बताउनुभयो ।
त्यस अवसरमा नगर खेलकुद विकास समितिका सदस्य श्रीराम नेपाली, विद्यालयका प्राचार्य माधव अर्याल, नेपाल तेक्वान्दो संघ प्रदेश ५ का सदस्य रामु बरुण, राजकुमार पाण्डे, एभरेष्ट तेक्वान्दो डोजाङका प्रमुख सुरज श्रेष्ठ, खेल संयोजक राजिव क्षेत्री लगायतले बोलेका थिए । कार्यक्रममा उत्कृष्ट प्रतियोगीलाई पुरस्कार वितरण समेत गरिएको थियो ।
प्रतिक्रिया