काठमाडौं । भारतीय सेनाद्वारा सहयोग स्वरुप प्रदान गरिएको एक लाख डोज कोरोना खोप नेपाली सेनालाई हस्तान्तरण गरिएको छ ।
जंङ्गी अड्डामा मंगलबार आयोजित एक कार्यक्रमका बीच औपचारिक रुपमा कोभिसिल्ड खोप सेनालाई हस्तान्तरण भएको हो । नेपालका लागि भारतीय राजदूत विनय मोहन क्वात्राले प्रधानसेनापति पूर्णचन्द्र थापालाई खोप हस्तान्तरण गरेका छन् ।
त्यसअघि कार्यक्रममा भारतीय स्थल सेनाध्यक्ष जनरल एम एम नरवणेले भिडियो कन्फ्रेन्समार्फत उक्त खोप प्रधान सेनापति थापालाई ग्रहण गर्न अनुरोध गरेका थिए ।
उक्त कार्यक्रममा जनरल नरवणेले मित्रराष्ट्रहरुलाई महामारीको समयमा सक्दो सहयोग गर्ने भारतीय सरकारको नीति अनुसार घनिष्ट सम्बन्ध रहेको नेपाली सेनालाई यस प्रकारको सहयोग गर्न पाउँदा अत्यन्तै खुशी लागेको बताएका थिए ।
प्रत्युत्तरमा प्रधान सेनापति पूर्ण चन्द्र थापाले यस सहयोगको लागि जनरल नरवणे, भारतीय सेना तथा भारतीय सेनाको सकल दर्जालाई धन्यवाद ज्ञापन गरेका थिए ।
यो सहयोगले नेपाली सेनाका सकलदर्जा एवं प्राथमिकताका आधारमा हिताधीकारीहरु समेत लाभान्वित हुने, महामारी विरुद्धको लडाईंमा नेपाली सेना अझ बढी प्रभावकारी रुपमा नेपाली जनताको सेवामा लाग्न सक्षम हुने भन्दै यस कार्यबाट दुई देशका सेनाबीच रहेको सम्बन्ध अझ बढी प्रगाढ भएको भावना ब्यक्त गर्नु गरेको सेनाले जारी गरेको विज्ञप्तिमा जनाइएको छ ।
प्रतिक्रिया