जनकपुर । नेकपा माओवादी केन्द्रले सर्वोच्चको आदेश पछि माओवादी केन्द्र ब्युंतिएपछि पनि एमालेमा लागेका प्रदेश २ का चार जना सांसदलाई दल त्यागको माध्यमबाट पद मुक्त गरेको छ ।
सर्वोच्च अदालतको फैसलाले एमाले र माओवादी केन्द्र पूर्ववत अवस्थामा ब्युँतिएपछि पनि पार्टीमा नफर्किएका चार जना सांसदलाई माओवादी केन्द्रले सांसद पदबाट पद मुक्त गराएको हो ।
एमालेतिर लागेका प्रदेशसभा सदस्यहरू रामचन्द्र मण्डल, ज्वाला साह, कुन्दनप्रसाद कुशवाहा र मोहम्मद समीरलाई सांसद पदबाट हटाइएको माओवादी केन्द्रका प्रमुख सचेतक दिलिप साहले जानकारी दिएका छन् ।
पार्टीको केन्द्रिय समितिले सोधेको २४ घण्टे स्पष्टीकरणको जवाफ नदिएपछि आइतबार उनीहरूलाई बर्खास्त गर्ने निर्णय भएको साहले बताए । माओवादी केन्द्रले शुक्रबार २४ घण्टे स्पष्टीकरण सोधेको थियो ।
माओवादी केन्द्रले सांसदहरूलाई बर्खास्त गरेको पत्र माओवादीले आजै प्रदेशसभा सचिवालयमा समेत बुझाएको छ । ११ जना सांसद सहित प्रदेश २ मा उपस्थिती जनाएको माओवादीका ४ सांसद पदमुक्त भएपछि माओवादी संसदीयदलमा अब सात सांसदमात्रै रहनेछन् ।
बर्खास्तमा परेका मण्डल माओवादी संसदीय दलका नेता थिए । माओवादी अध्यक्ष पुष्पकमल दाहाल प्रचण्डलगायतका केन्द्रीय नेताहरूले बारम्बार उनलाई पार्टीमा फर्किन आग्रह गरेपनि उनले अस्वीकार गर्दै आएका थिए ।
प्रतिक्रिया