काठमाडौं । २०७२ बैशाा १२ गतेको विनाशकारी भूकम्पले ढलाएको धरहरा फेरि ठडिएको छ ।
ऐतिहासिक धरोहर धराहरा नयाँ स्वरुपमा पुनर्निर्माण भएको हो । यही बैशाख ११ गते प्रधानमन्त्री केपी शर्मा ओलीले नवनिर्मित धरहराको उद्घाटन गर्ने कार्यक्रम रहेको छ ।
भूकम्पको ६ वर्ष पुगेको अवसरमा प्रधानमन्त्री ओलीले धरहरा उद्घाटन गर्न लागेका हुन् । यद्यपी, पुनर्निर्माणको काम भने अझै सकिएको छैन । जसकाकारण प्रधानमन्त्रीले उद्घाटन गरेपनि आम सर्वसाधारणले भने धरहराको टुप्पोमा पुगरे फेरि एकपटक काममाडौंको दृश्यावलोकन गर्नका लागि अझै केही समय कुर्नुपर्ने हुन्छ ।
भूकम्पले ९ तले धरहरा ढलाएको थियो । अहिले २२ तलाको धरहटा ठडिएको छ । पुरानो धरहराको भग्नावशेषलाई सिसाले छोपेर संरक्षण गर्ने राष्ट्रिय पुनर्निर्माण प्राधिकरणको योजना रहेको छ ।
उद्घाटनको दिन नजिकिँदै जाँदा नयाँ धरहरामा अन्तिम काम भैरहेको छ । अहिले टुप्पोमा गुजुर राख्ने काम भैरहेको छ भने, फलामे फ्रेमलाई विस्तारै खोलिँदै लगिएको छ । फ्रेम खोलिँदा काठमाडौंको पहिचान बोकेको धरहराको पुरानै रुप देख्न थालिएको छ ।
धरहराको टावर बाहेक अन्य काम पनि धमाधम भैरहेको छ । टावरको रंगरोगनको काम पनि लगभग सकिएको छ । पार्किङ र म्युजियम लगायतका संरचनाको काम भने सकिन अझै लामो समय लाग्ने देखिन्छ ।
तस्बिर : रासस/राष्ट्रिय पुनर्निर्माण प्राधिकरण
प्रतिक्रिया